ក្លឹបMuangthong United របស់ថៃ បានប្រកាសជាផ្លូវការក្នុងការនាំយកខ្សែប្រយុទ្ធប្រេស៊ីល Heberty Fernandes មកពង្រឹងក្រុមក្នុងកុងត្រារយ:ពេល២ឆ្នាំ។
ក្រោយពីលក់កីឡាករ Cleiton Silva ដែលជា Top Scorer នៅក្នុងក្រុមចេញទៅឱ្យក្លឹប Shanghai Shenxin របស់ប្រទេសចិនទៅ ក្រុម Muangthong បានសម្រេចនាំយកកីឡាករប្រេស៊ីលម្នាក់មកលេងតំបន់ប្រយុទ្ធទៀតហើយ។ ដោយកីឡាកររូបនេះមានឈ្មោះថា Fernandes ទិញពីក្រុម Al-Shabaab របស់ប្រទេសអារ៉ាប់បីសាអូឌីត និងមានកុងត្រារយ:ពេល២ឆ្នាំជាមួយកីឡាករម្នាក់នេះ។ កីឡាករវ័យ២៨ឆ្នាំរូបនេះនឹងទទួលបានអាវលេខ៧របស់ក្លឹប ដែលជាអតីតលេខអាវរបស់កីឡាករ Datsakorn Thonglao ។
តែទោះជាយ៉ាងនេះក្ដី ខ្សែប្រយុទ្ធខាងលើនេះមិនអាចបានលេងក្នុងជើងទី១ពានរង្វាន់លីគកំពូលថៃបាននោះទេ ព្រោះអីរូបគេចុះឈ្មោះមិនទាន់។ Fernandes អាចចូលលេងបានក្នុងពានរង្វាន់ Cup ផ្សេងៗ មុនពេលជើងទី២នៅលីគទើបបានចូលជួយក្រុមបាន។
កីឡាករប្រេស៊ីលខាងលើនេះគឺជាអ្នករកគ្រាប់បាល់ពូកែម្នាក់ កាលពីរូបគេនៅលេងឱ្យក្រុម Ratchaburi FC ក្នុងប្រទេសដែរ។ Fernandes ត្រូវបានគេស្គាល់ថាជាខ្សែប្រយុទ្ធពូកែស៊ុតបាល់ឆ្ងាយ និងហ្វ្រីឃីកគេល្អ។ កាលមិនទាន់ផ្លាស់ទៅអារ៉ាប់បីសាអូឌីត កីឡាកររូបនេះបង្ហាញខ្លួនឱ្យ Ratchaburi ចំនួន៩០ប្រកួត រកបានដល់៦៥គ្រាប់ឯណោះ៕
មតិយោបល់