លោក Gianni Infantino ប្រធាន FIFA បានបញ្ជាក់ថាបម្រាមចំពោះជនម៉ូស្លីមរបស់លោក Donald Trump អាចនឹងធ្វើឱ្យអាមេរិកមិនអាចធ្វើជាម្ចាស់ផ្ទះពានរង្វាន់ World Cup នៅឆ្នាំ២០២៦នោះទេ។
Trump បានចេញបម្រាមមួយសម្រាប់ជនម៉ូស្លីមចូលទឹកដីអាមេរិក ខណៈដែលនេះបានធ្វើឱ្យមានការតវ៉ាប្រឆាំងជាខ្លាំង រហូតមានបាតុកម្មជាច្រើនកន្លែងថែមទៀតផង។ ដោយឡែកបម្រាមនោះដាក់សម្ពាធខ្លាំងទៅលើប្រជាជនមកពីប្រទេសអឺរ៉ង់ សិរី លីបី សូម៉ាលី សូដង់ និងយឺមែន។
និយាយនៅទីក្រុងឡុង លោក Infanino ប្រធានសហព័ន្ធបាល់ទាត់អន្ដរជាតិបង្ហើបថា៖ “ពេលដែល FIFA មានការប្រកួត គ្រប់ក្រុមទាំងអស់ រួមទាំងអ្នកគាំទ្រផងនោះ នឹងត្រូវទៅទាំងអស់គ្នា។ យើងមិនអាចឱ្យក្រុមមួយលេងដោយគ្មានអ្នកគាំទ្រនោះទេ។ លោក Trump កំពុងតែធ្វើការងារគាត់យ៉ាងល្អ ទើបគេបោះឆ្នោតឱ្យគាត់ធ្វើជាប្រធានាធិបតី។ តែបម្រាមរបស់គាត់ អាចនឹងធ្វើឱ្យ FIFA ទទួលយកមិនបាននោះទេ”។
អាមេរិកជាបេក្ខភាពមួយរូបដែលត្រូវបានគេគិតថានឹងអាចឈ្នះក្នុងការធ្វើជាម្ចាស់ផ្ទះ World Cup 2026 ខាងមុខនេះ។ ខណៈដែលនៅពេលនោះ ព្រឹត្តិការណ៍ធំ ៤ឆ្នាំមានម្ដងនេះ នឹងមានក្រុមចូលរួមកើនដល់៤៨ក្រុមឯណោះ៕
មតិយោបល់