ព័ត៌មានកីឡា

Morata ​និង​គូ​ដណ្ដឹង​កំពុង​តែ​ស្វែង​រក​ផ្ទះ​នៅ​ទី​ក្រុង​ឡុង

នេះ​អាច​ជា​សញ្ញា​មួយ​បញ្ជាក់​ថា Alvaro Morata ​កំពុង​តែ​ជិត​ផ្លាស់​ទៅ​លេង​នៅ​ក្លឹប​នា​ប្រទេស​អង់គ្លេស​ហើយ ​ក្រោយ​ពី​មាន​ដំណឹង​មក​ថា​រូបគេ​និង​គូ​ដណ្ដឹង​កំពុង​តែ​ស្វែង​រក​ផ្ទះ​នៅ​ទីក្រុង​ឡុង។

Morata ​តាំង​ពី​ផ្លាស់​ទៅ​លេង​នៅ Real Madrid ​វិញ​មក ហាក់​ដូចជា​មិន​ទាន់​បាន​បង្ហាញ​ទម្រង់​លេង​ឱ្យ​លើស Karim Benzema ​ដើម្បី​កាន់កាប់​តំណែង​ជម្រើស​១១​នាក់​ដំបូង​នោះ​ទេ។ ដោយ​រូបគេ​ភាគ​ច្រើន​អង្គុយ​កៅអី​បម្រុង ​ហើយ​ផ្លាស់​ចូល​លេង​នៅ​ចុង​តង់​ប៉ុណ្ណោះ។ យ៉ាងណាមិញ​ហេតុផល​មិន​សូវ​បាន​លេង​នេះ​ហើយ ​បាន​ជា​ខ្សែ​ប្រយុទ្ធ​ជម្រើស​ជាតិ​អេស្ប៉ាញ​មួយ​នេះ ​កំពុង​តែ​ចង់​ផ្លាស់​ទៅ​លេង​នៅ​ក្លឹប​ណា​ដែល​អាច​បាន​ចូល​លេង​ច្រើន​ហើយ។

ខណ:​ដែល​ក្លឹប​នៅ​អង់គ្លេស ​ដូចជា Chelsea , Man Utd ​និង Arsenal ​អី​នោះ សុទ្ធ​តែ​មាន​បំណង​ចង់​បាន​រូបគេ​ទាំង​អស់ ​ដោយ​អាច​នឹង​ដាក់​តម្លៃ​ខ្លួន​ទិញ​យក​នៅ​រដូវ​ក្ដៅ​ខាង​មុខ​នេះ​ហើយ។ អ្វី​ដែល​កាន់​តែ​អ្នក​ស្នេហា​វិស័យ​កីឡា​នៅ​អង់គ្លេស​សប្បាយ​ចិត្ត​នោះ គឺ​មាន​ដំណឹង​មួយ​បាន​ធ្លាយ​មក​ថា​គូ​ដណ្ដឹង​របស់​កីឡាករ​ខាង​លើ​នេះ ​កំពុង​តែ​ស្វែង​រក​ផ្ទះ​នៅ​ទីក្រុង​ឡុង​ហើយ ​ដើម្បី​ស្នាក់​នៅ ប៉ុន្តែ​មិន​ទាន់​ច្បាស់​ថា​វា​ជា​ការ​ស្នាក់​នៅ​យ៉ាង​ណា​នោះ​ទេ។

Morata ​ជា​ខ្សែ​ប្រយុទ្ធ​មុត​ស្រួច​ម្នាក់​របស់ Real Madrid ​ដែល​បាន​ផ្លាស់​ទៅ​លេង​នៅ Juventus ​ក៏​ឡើង​ជើង ​ហើយ​ក៏​ផ្លាស់​មក​លេង​នៅ​ក្លឹប​ចាស់ Real ​វិញ ​ប៉ុន្តែ​មិន​គាប់​បំណង​នោះ​ទេ ព្រោះ​មិន​សួវ​បាន​ចូល​លេង៕

មតិយោបល់