កាលពីថ្ងៃ អាទិត្យ ទី ៧ ខែ ឧសភា ឆ្នាំ ២០១៧ ក្រុមបាល់ទាត់ វេស្ទើនភ្នំពេញ បានប្រកួតចាញ់ក្រុម អាស៊ីអឺរ៉ុប យូណាយធីត ១ទល់៣ ក្នុងពានរង្វាន់លីគកំពូលកម្ពុជា រដូវកាល ២០១៧ សប្តាហ៍ទី ១០ នៅកីឡដ្ឋានវេស្ទើន។

តាមការសាកសួរពីក្រុមការងារ Post Sport លោក ស៊ុំ វណ្ណា គ្រូបង្គោលវេស្ទើនបាននិយាយថា៖ « កីឡាករធ្លាក់ទំនុកចិត្តក្នុងការលេង ហើយខ្សែការពារនៅមានអារម្មណ៍ភ័យច្រើន កាលណាយើងភ័យការកាត់យកបាល់មិនបានល្អ បាត់បង់ឆន្ទ:ក្នុងការលេង» ស្របពេលដែលលោក សុក វាសនា គ្រូបង្គោលអាស៊ីអឺរ៉ុប ថា « នៅដើមតង់ទី១ ប្រព័ន្ធប្រយុទ្ធមានបញ្ហា ហើយកីឡាករជាប់ពិន័យច្រើន ទោះបីឈ្នះពិតមែនតែមិនទាត់ល្អទេ ដោយសារតែការទាត់បាល់ចំគោលដៅមានតែ៣លើក ហើយរកបាន៣គ្រាប់ នេះជាសំណាង »។

គិតត្រឹមសប្តាហ៍ទី១០ វេស្ទើនភ្នំពេញ ប្រកួតបាន១០លើក ឈ្នះ៣ដង ស្មើ៣ដង និងចាញ់៤ដង ស្ថិតនៅលេខ៨ មាន១២ពិន្ទុក្នុងដៃ ខណ: អាស៊ីអឺរ៉ុប ១០ប្រកួត ឈ្នះ៣ ស្មើ១ និងចាញ់៦ មាន១០ពិន្ទុ កំពុងឈរនៅចំណាត់ថ្នាក់លេខ១០ រួចផុតពីតំបន់ដែលកាត់ទៅលេងលីគលំដាប់ទី២ បណ្តោះអាសន្ន៕