ថ្វីបើខ្សែប្រយុទ្ធអាហ្សង់ទីន Lionel Messi មិនអាចជួយក្រុម Barcelona ឲ្យឡើងទៅកាន់វគ្គពាក់​កណ្តាលផ្តាច់ព្រ័ត្រ Champion League ក៍ដោយតែការជួួយក្លិបឲ្យឈ្នះ Copa dey Rey និង Laliga នេះដែរ បានធ្វើឲ្យកីឡាកររូបនេះ ក្លាយជាកីឡាករ​ដែលរកប្រាក់ចំណូលបានច្រើនជាងគេបំផុត​ប្រចាំរដូវកាលនេះ។

បើតាមការចុះផ្សាយរបស់កាសែត AS បានឲ្យដឹងថា Lionel Messi បានវ៉ាដាច់ Cristiano Ronaldo ក្នុងការក្លាយខ្លួនជាកីឡាករដែលរកប្រាក់ចំណូលបាន​ច្រើនជាងគេបំផុតប្រចាំរដូវកាល។ ជាការពិតណាស់ Messi ទទួលបានចំណូលសរុបរហូតដល់ទៅ ១២៦ លានអឺរ៉ូ ខណ: Ronaldo ដែលធ្លាប់ជាកីឡាករ​រកចំណូលបានច្រើនជាងគេនោះ ធ្លាក់មកនៅលេខ២វិញ ដោយរកបានត្រឹម ៩៤ លានអឺរ៉ូប៉ុណ្ណោះ។ គួរបញ្ជាក់ផង​ដែរថា កាលពីរដូកាលមុន Messi រកចំណូលបានត្រឹម ៧៦,៥លានអឺរ៉ូ ប៉ុណ្ណោះ ស្របពេលដែលរដូវកាលនេះ កីឡាករឆ្នើមអាហ្សង់ទីន អាចរកបានចំណូលច្រើនជាង​មុនជិតគុណនឹងពីរ នៃរដូវកាលមុន។

យ៉ាងណាវិញ Neymar ឈរលេខ ៣ ដោយរកចំណូលបាន ៨១ លានអឺរ៉ូ តាមពីក្រោយដោយ Gareth Bale រកបាន ៤៤ លានអឺរ៉ូ និង Gerrard Pique រកបាន ២០ លានអឺរ៉ូ។ ប្រាក់ចំណូលនេះដែរ​ ទទួលបានពីតម្លៃពលកម្មរបស់​កីឡាករពីក្លិប ដោយកាត់ពន្ធ រួចរាល់ហើយ បូករួមទាំង​ប្រាក់បន្ថែម និងប្រាក់ឧបត្ថម្ភផ្សេងៗទៀត។