ក្រោយពីការសម្រេចចិត្តចាកចេញរបស់ខ្សែប្រយុទ្ធ ប្រធានក្រុម Wayne Rooney លោក Jose Mourinho កំពុងតែពិបាកសម្រេចចិត្តចំពោះបេក្ខភាពប្រធានក្រុមថ្មីរបស់ក្រុមបីសាចក្រហម Manchester United ។

ជាការពិតណាស់ ការដាក់បេក្ខភាពប្រធានក្រុម គឺជារឿងមួយយ៉ាងលំបាកសម្រាប់ក្លិបបាល់ទាត់នីមួយៗព្រោះថា ប្រធានក្រុមគឺជា Key Player របស់ក្លិប ដែលសំខាន់បំផុត។ ជាក់ស្តែងណាស់ ក្រុមបីសាចក្រហម Manchester United កំពុងតែប្រឈមជាមួយនឹងបញ្ហានៃការរើសប្រធានក្រុមថ្មី ក្រោយការចាកចេញរបស់ប្រធានក្រុមចាស់ Wayne Rooney ទៅកាន់ក្រុម Everton ។ ក្នុងនោះដែរ បើតាម ESPN report បានឲ្យដឹងថា លោក Jose Mourinho កំពុងតែសម្រាំងនូវ កីឡាករ៥ នាក់សម្រាប់មកជំនួសតំណែង ប្រធានក្រុមថ្មីរបស់បីសាចក្រហម Manchester United ។

កីឡាករដំបូងនោះគឺ​ Michael Carrick ដែលធ្លាប់កាន់តួនាទីជាប្រធានក្រុម នៅពេលដែលមិនមានវត្តមានរបស់ខ្សែប្រយុទ្ធ Wayne Rooney ។ ក៍ប៉ុន្តែ ខ្សែបម្រើរូបនេះ ហាក់មិនសូវមានវត្តមាននៅគ្រប់ការប្រកួតឲ្យ Man Utd ឡើយ។ យ៉ាងណាក៍ដោយ បទពិសោធន៍ ជាច្រើនដែល Carrick ធ្ឥាប់លេងឲ្យក្លិបតាំងពីជំនាន់លោក Sir Alex Ferguson មិនមែនជាបញ្ហាចោទសម្រាប់រូបគេឡើយ។

ខ្សែបម្រើការពារ Antonio Valencia ក៍ធ្លាប់បានកាន់តំណែងប្រធានក្រុមម្តងម្កាលដែរ។ កីឡាកររូបនេះលឿន រហ័យ និងជាកីឡាករសំខាន់ប្រចាំក្លិប។ ម្យ៉ាងវិញទៀត Valencia មានបទពិសោធន៍ច្រើនក្នុងការលេងឲ្យក្រុម Man Utd ។

ខ្សែបម្រើឆ្នើមទើបទិញ កាលពីរដូវកាលមុន Paul Pogba ក៍ស្ថិតនៅក្នុងជម្រើសនេះដែរ ព្រោះថា Pogba លេងបានយ៉ាងល្អ នៅតំបន់កណ្តាល និងខាងលើ ហើយតែងតែចុះជួយខាងល្រោមជានិច្ច។ តែ Pogba ទើបតែមកកាន់ Man Utd បាន១រដូវកាល ពិបាកនឹងទទួលតំណែងនេះខ្លាំងណាស់។

អ្នកចាំទី Devid De Gea ស្ថិតនៅក្នុងជម្រើសជាប្រធានក្រុមរបស់បីសាចក្រហម Manchester United ផងដែរ។ តែមិនទាន់ប្រាកដនៅឡើយទេ ប្រសិនបើ អ្នកចាំទីរូបនេះមិនចាកចេញទៅ Real Madrid ទេនោះ រូបគេអាចនឹងមានឱកាសច្រើនក្នុងការធ្វើជាប្រធានក្រុម Man Utd ថ្មី។

ខ្សែបម្រើដ៍មានប្រជាប្រិយភាព Ander Herrera ដែលបានឈ្នះពានកីឡាករឆ្នើមប្រចាំក្រុម Man Utd កាលពីពេលថ្មីៗនេះ ក៍ជាបេក្ខភាព ក្នុងការប្រជែងតំណែងប្រធានក្រុមផងដែរ។ Herrera ត្រូវបានគេរំពឹងថា នឹងក្លាយជាប្រធានក្រុមថ្មីរបស់ Man Utd ព្រោះថា ខ្សែបម្រើរូបនេះ មានការចាប់អារម្មណ៍ច្រើនពីក្លិបនិងអ្នកគាំទ្រ។ ម្យ៉ាងវិញទៀត បើ Herrera មិនទៅកាន់ Barcelona ទេនោះ តំណែងប្រធានក្រុមថ្មី Man​ Utd នឹងបានទៅលើ Key Player រូបនេះ ស្របពេលដែលលោក Jose Mourinho ស្រឡាញ់ និងតែងតែផ្តល់ឱកាសឲ្យ កីឡាកររូបនេះលេងសឹងគ្រប់ការប្រកួត។

រង់ចាំមើលទាំងអស់គ្នា តើរវាងកីឡាករ Michael Carrick, Antonio Valencia, Paul Pogba, Devid De Gea និង Ander Herrera អ្នកណាម្នាក់នឹងក្លាយជាប្រធានក្រុមថ្មីរបស់ក្រុមបីសាចក្រហម Manchester United។