ក្លឹបបាល់ទាត់ Liverpool បានបដិសេធសំណើរ៣០លានផោនរបស់ក្លឹប Crystal Palace ក្នុងការទិញយកខ្សែប្រយុទ្ធ Christian Benteke ។ នេះបើតាម The Sun បានចុះផ្សាយ។

ក្លឹប Crystal Palace កំពុងកាន់ប្រាក់២៥លានផោន ដែលបានទិញការលក់ Yannick Bolasie ទៅឱ្យក្លឹប Everton កាលពីប៉ុន្មានថ្ងៃមុននេះ ហើយពួកគេក៏កំពុងតែតាមប្រមាញ់យកខ្សែប្រយុទ្ធថ្មីម្នាក់មករួមក្រុមរដូវកាលថ្មីវិញផងដែរ។ ក្រុម Crystal បានមើលឃើញកីឡាករ Benteke របស់ Liverpool ដែលនៅទំនេរអង្គុយកៅអីបម្រុង ឱ្យបានដាក់សំណើរទិញយកក្នុងតម្លៃ៣០លានផោន។

តែយ៉ាងណាក្ដី ក្រុមហង្សក្រហមបានទាត់ចោលសំណើរនោះបាត់ទៅហើយ ដោយរំពឹងថាកីឡាកររូបនេះ អាចនឹងលក់បានថ្លៃជាងនេះ ហើយប្រសិនបើគ្មានក្រុមណាហានដល់ទេនោះ លោក Klopp អាចនឹងទុកដើម្បីហ្វឹកហាត់ឱ្យខ្លាំងឡើងវិញ។

Benteke ជាកីឡាករដែល Liverpool ទិញចូលកាលពីរដូវកាលមុន ពីក្រុម Aston Villa ក្នុងតម្លៃខ្លួន៣២,៥លានផោន ដោយកាលនោះលោក Brendan Rodgers ជាអ្នកទិញចូល។ ខណ:ដែលក្រោមការដឹកនាំរបស់លោក Klopp ខ្សែប្រយុទ្ធរូបនេះ ហាក់មិនសូវបានចូលលេងនោះទេ៕