ក្លិប Stoke City បានចុះហត្ថលេខាលើខ្សែប្រយុទ្ធ Jese Rodriguez អតីតរបស់ក្លិប Real Madrid នៅលើក្នុងការខ្ចីជើងរយៈពេលវែងពីក្លិប Paris St-Germain ។

កីឡាករវ័យ ២៤ ឆ្នាំរូបនេះ ធ្លាប់បានចូលរួមជាមួយ Real នៅអាយុ ១៤ ឆ្នាំមក និងជាផ្នែកមួយនៃក្រុមដែលឈ្នះពានរង្វាន់ Champions League ក្នុងឆ្នាំ ២០១៤ និង ២០១៦ ។ ខ្សែប្រយុទ្ធ Jese បានចូលរួមជាមួយ PSG កាលពីខែសីហា ក្នុងតម្លៃ ២១ លានផោន ក្នុងកិច្ចសន្យារយៈពេល ៥ ឆ្នាំ ប៉ុន្តែបានស៊ុតបញ្ចូលទីតែ ២គ្រាប់ទេ ក្នុងការបង្ហាញខ្លួន ១៤លើក មុនពេលគាត់ត្រូវបានខ្ចីជើងទៅក្លឹបអេស្ប៉ាញ Las Palmas កាលពីខែមករា សម្រាប់រដូវកាលដែលនៅសល់។

លោក Tony Scholes នាយកប្រតិបត្តិក្លិប Stoke បាននិយាយថា៖ “គាត់មិនមានពេលវេលារីករាយបំផុតក្នុងអាជីពរបស់គាត់នៅទីក្រុងប៉ារីសទេប៉ុន្តែគាត់នៅវ័យក្មេង ហើយអាចជាផ្នែកនៃការចង់បានរបស់ក្រុមដទៃនិងមានចំណាប់អារម្មណ៍យ៉ាងខ្លាំងនៅក្នុងក្របខ័ណ្ឌ Premier League” ។

សូមបញ្ជាក់ថា Jese គឺជាកីឡាករទី ៦ ដែលបានចុះហត្ថលេខាជាមួយក្លិប Stoke ពោលគឺ ខ្សែការពារ Bruno Martins Indi, ខ្សែការពារ Kurt Zouma ខ្ចីជើងពី Chelsea ផងដែរខណៈដែលខ្សែបម្រើ Darren Fletcher ខ្សែការពារកីឡាករ Josh Tymon និងខ្សែបម្រើស្លាប Eric Maxim Choupo-Moting ទាំងអស់បានចូលរួមក្នុងការផ្ទេរដោយឥតគិតថ្លៃ៕