ខ្សែបម្រើបារាំង Paul Pogba ដែលកំពុងតែប្រកបអាជីពឲ្យក្រុមបីសាចក្រហម Manchester United បានឈ្នះពាន Europa League Player of the Season for 2016-17 ។

នេះគឺជាលើកដំបូងហើយសម្រាប់កីឡាករស្បែកខ្មៅ Paul Pogba បានឈ្នះនូវពានរង្វាន់ ផ្ទាល់ខ្លួនក្នុងក្របខ័ណ្ឌបាល់ទាត់នៅអឺរ៉ុប។ ជាការពិតណាស់ មួយថ្ងៃមុននេះ Ronaldo បានឈ្នះពាន UEFA Player of The Year ខណះកីឡាករ Paul Pogba បានឈ្នះពានដូចគ្នា នេះ Europa League Player of the Season for 2016-17 ស្ថិតក្នុងកម្រិតទី២ របស់អឺរ៉ុប។ Pogba បានទទួលសម្លេងឆ្នោត ៤៨ ក្នុងចំណោម ៥៥សម្លេងពីការបោះឆ្នោតរបស់អ្នកសារពត៌មាន ដែលធ្វើឲ្យកីឡាកររូបនេះឈ្នះពានអឺរ៉ុបលើកដំបូង។

គួរបញ្ជាក់ផងដែរថា Pogba បានបង្ហាញខ្លួន ១៥ប្រកួតនៅ Europa League រដូវកាលមុន ដោយស៊ុតបាន ៣គ្រាប់ ជួយឲ្យក្រុម បីសាចក្រហម Manchester United ឈ្នះពាន Europa League លើកដំបូងផងដែរ។ ម្យ៉ាងវិញទៀត Paul Pogba ក៍ស្ថិតនៅក្នុងបញ្ជីឈ្មោះ កីឡាករល្អ ដែលត្រូវបោះឆ្នោតជាកីឡាករ ១១នាក់ល្អប្រចាំឆ្នាំ នាពេលខាងមុខនេះផងដែរ។ ដូច្នេះហើយ នេះគឺជាការខិតខំប្រឹងប្រែងយ៉ាងល្អរបស់កីឡាករវ័យក្មេងបារាំងរូបនេះ ខណៈរូបគេនៅមានភារកិច្ចបន្តទៀត ដើម្បីប្រជែងពានឲ្យក្លិប និងរូបគេផ្ទាល់។