បន្ទាប់ពីភាពមិនច្បាស់លាស់ ទាក់ទងនឹងតួនាទីអ្នកទាត់បាល់១១ម៉ែត្រ របស់ក្រុម Paris Saint Germain ដែលបង្កឲ្យមានបញ្ហានាពេលកន្លងមកនោះ ឥលូវនេះ តួនាទីនេះ បានធ្លាក់មកលើ Neymar យ៉ាងពិតប្រាកដហើយ។
ការទាត់បាល់ ១១ម៉ែត្រនៅក្រុម Paris Saint Germain គឺជាដើមចមនៃជម្លោះរវាង Neymar និង Cavani នាពេលកន្លងមក ដែលធ្វើឲ្យមានការប្រេះស្រាំគ្នារវាងកីឡាករទាំង២ នាពេលកន្លងមក។ យ៉ាងណាវិញ តាមរយ:ដំណោះស្រាយជាច្រើន ដែលក្រុម Paris Saint Germain បានដោះស្រាយ នាពេលកន្លងនក ហាក់ដូចជា មិនទទួលបានភាពជោគជ័យឡើយ រួមទាំងការបដិសេធ មិនទទួលយកលុយ ១លានអឺរ៉ូដើម្បីផ្តល់តួនាទីអ្នកទាត់បាល់ ១១ម៉ែត្រទៅឲ្យ Neymar ពីសំណាក់ Cavani ផងដែរ។
យ៉ាងណាវិញ តាមរយ:ការប្រកួតជាមួយក្រុម Bordeaux យប់មិញនេះ បានបង្ហាញឲ្យឃើញថា ច្រកបញ្ហារបស់ក្រុម Paris Saint Germain ត្រូវបានដោះស្រាយហើយ ព្រោះថា Cavani បានយល់ព្រមឲ្យ Neymar ជាអ្នកទាត់បាល់ ១១ម៉ែត្រហើយ ដោយមិនមានការដណ្តើម និងប្រជែងគ្នាឡើយ។ Neymar បានស៊ុតបាល់ ១១ម៉ែត្រ នៅនាទីទី៤០ ដែលជាគ្រាប់បាល់ទី២របស់រូបគេ ក្នុងការប្រកួត ជាមួយក្រុម Bordeaux ដែលបានជួយឲ្យ Paris Saint Germain ឈ្នះក្នុងលទ្ធផល ៦-២។
ដូច្នេះហើយ តួនាទីអ្នកទាត់បាល់ ១១ម៉ែត្ររបស់ក្រុម Paris Saint Germain ចាប់ពីពេលនេះទៅ មិនមានការស្មុគស្មាញទៀតឡើយ ព្រោះថា Edinson Cavani បានយល់ព្រមផ្តល់តួនាទីនេះទៅដល់ កីឡាករចំណូលថ្មី Neymar ដើម្បីបញ្ចប់បញ្ហា ក្នុងក្រុម និងដើម្បីសហការគ្នា ក្នុងការប្រកួតដណ្តើមពានវិញជាជាងដណ្តើមយកមុខមាត់។
មតិយោបល់