លោក Jose Mourinho អ្នកចាត់ការទូទៅ​ របស់ក្រុមបី​សាចក្រហម Manchester United បានទទូចដល់គ្រូ​បង្វឹកជម្រើសជាតិអង់គ្លេសលោក Gareth Southgate កុំឲ្យដាក់ ខ្សែប្រយុទ្ធវ័យក្មេង Marcus Rashford លេងទាំង២ប្រកួតចុងក្រោយឲ្យជម្រើសជាតិអង់គ្លេស។

ជាការពិតណាស់ ក្រុមជម្រើសជាតិអង់គ្លេស នឹងត្រូវប្រកួត ២លើកចុងក្រោយ នៃការជម្រុះ World Cup ២០១៨ នៅប្រទេសរុស្ស៊ី ដែលអង់គ្លេសត្រូវបើកទ្វារ Wembley ទទួលក្រុមជម្រើសជាតិ ស្លូវេនៀ នៅយប់នេះ និង ១ប្រកួត ទៀតត្រូវទៅលេងនៅទឹកដីក្រុម លីទុយអានី នៅចុងសប្តាហ៍ផងដែរ។ យ៉ាងណាវិញ សម្រាប់លោក Jose Mourinho ហាក់មិនចង់ឲ្យលោក Gareth Southgate ប្រើប្រាស់ Rashford ទាំង២ប្រកួតនេះឡើយ ព្រោះថាលោក Mourinho មានបំណងចង់ទុក Rashford ដើម្បីទៅប្រកួតសប្តាហ៍ទី ៨​ ជាមួយក្រុមហង្សក្រហម Liverpool នៅថ្ងៃទី ១៤ខាងមុខនេះ។​ លោក Mourinho បានឲ្យដឹងតាម Sky Sports ថា ក្រុមជម្រើសជាតិអង់គ្លេស​ ពិតជាត្រូវការចាំបាច់ ចំពោះកីឡាករល្អៗ​ ដូចជា Rashford ជាដើម ដើម្បីនាំអង់គ្លេស ទៅកាន់វគ្គចែកពូល​ ព្រឹត្តិការណ៍ដ៍ធំ FIFA World Cup នៅឆ្នាំក្រោយក្នុងប្រទេសរុស្ស៊ី។

យ៉ាងណាវិញ លោក Mourinho បានបញ្ជាក់យ៉ាងច្បាស់ថា អង់គ្លេសមានសង្ឃឹមច្រើនណាស់ក្នុងការឈ្នះ ស្លូវានៀយប់នេះ ម្យ៉ាងវិញទៀត បើឈ្នះហើយ អង់គ្លេស គឺមានសុវត្ថិភាព ក្នុងការឡើងទៅកាន់វគ្គចែកពូល ដូច្នេះហើយ ប្រកួតក្រោយ អង់គ្លេសមិនប្រឹងក៍ឡើងដែរ។​ ដោយហេតុនេះហើយ លោក Mourinho ចង់ឲ្យការប្រកួត​ទី២​ ជាមួយលីទុយអានី មិនមានវត្តមានរបស់ Rashford ច្រើនជាង ដើម្បីទុកជើងកីឡាករល្អរូបនេះ ប្រកួតក្នុងដីក្រុម Liverpool ។ បន្ថែមលើនេះ លោក Jose Mourinho សង្ឃឹមថា ប្រសិនបើលោក Gareth Southgate មិនប្រើ Rashford ទាំង២ប្រកួត គឺរឹតតែប្រសើរសម្រាប់បីសាចក្រ​ហម Manchester United​ ហេតុផលចម្បងនោះ លោក Mourinho ខ្លាច Rashford រងរបួសដោយយថាហេតុ ក្នុងការប្រកួតនេះ។

ដូច្នេះហើយ លោក Jose Mourinho កំពុងអ៊ុតមើលលោក Gareth Southgate ដែលនឹងប្រើប្រាស់កីឡាករយប់នេះទល់ក្រុម ស្លូវេនៀ និងអ៊ុតមើលលទ្ធផលរបស់អង់គ្លេសតែម្តង។