កំពូលខ្សែប្រយុទ្ធ Cristaino Ronaldo មិនមានបំណងចង់បន្តកុងត្រាថ្មីជាមួយក្រុម Real Madrid ឡើយ បន្ទាប់ពីកីឡាកររូបនេះ លេងធ្លាក់ទម្រង់យ៉ាងខ្លាំងនៅរដូវកាលនេះ។

បើតាមការចុះផ្សាយរបស់ The Goal បានឲ្យដឹងថា Cristiano Ronaldo បានប្រាប់សារពត៌មាន នាពេលថ្មីៗ នេះថា រូបគេមិនមានបំណងចង់បន្តកុងត្រាថ្មីជាមួយ​ក្រុម​Real Madrid ឡើយ។ ប្រភពខាងលើដដែល បានឲ្យដឹងបន្ថែមទៀតថា Ronaldo មិនចង់មានតម្លៃខ្លួនចាញ់ខ្សែប្រយុទ្ធកំពូលពីររូប គឺ Neymar ដែលផ្លាស់ទៅកាន់ក្រុម Paris Saint Germain ក្នុងតម្លៃ ២២២លានអឺរ៉ូ និង ដៃគូប្រជែងដ៍ធំបំ​ផុត Lionel Messi ដែលបន្តកុងត្រាថ្មីជាមួយក្រុម Barcelona ទទួលបាន ៣០លានផោនក្នុងមួយឆ្នាំ។ យ៉ាងណាវិញ Ronaldo ប្រសិនបើផ្លាស់ទៅកាន់ក្រុមផ្សេង​នៅអឺរ៉ុប ទំនងជាតម្លៃខ្លួន របស់តារាឆ្នើមរូបនេះ មិនទាបឡើយ អាចខ្ពស់ជាងតម្លៃផ្ទេររបស់ Neymar ទៅកាន់ Paris Saint Germain ផងដែរ។

គួរបញ្ជាក់ផងដែរថា Cristiano Ronaldo កាលពីរដូវកាលមុន គឺជាតួអង្គយ៉ាងសំខាន់ក្នុងការជួយក្រុម Real Madrid ឲ្យឈ្នះពាន Laliga និង Champion League ព្រមទាំង​ទទួលបានពានរង្វាន់ចំនួន២ នាពេលថ្មីៗកន្លងមកនេះ។ ក៍ប៉ុន្តែ រដូវកាលនេះ Ronaldo ហាក់ដូចជាធ្លាក់ទម្រង់​លេងជាងមុនយ៉ាងខ្លាំង ថ្វីបើខ្សែប្រយុទ្ធកំពូលរូបនេះ ស៊ុតបាន ៦គ្រាប់នៅ Champion League ក៍ដោយ តែនៅ Laliga កីឡាកររូបនេះ ទើបតែរកបាន១គ្រាប់ប៉ុណ្ណោះ ដែលនេះបង្ហាញឲ្យឃើញពីការធ្លាក់ទម្រង់លេងយ៉ាងខ្លាំង របស់ Ronaldo។

យ៉ាងណាក៍ដោយ ការសម្រចចិត្ត​ មិនបន្តកុងត្រាថ្មីជាមួយ Real Madrid ប្រហែលជាមាន​ជម្រើស២ សម្រាប់កីឡាកររូបនេះ ទី១ ផ្លាស់ទៅកាន់ Manchester United និងទី២ ផ្លាស់ទៅកាន់លីគកំពូលរបស់ចិន ដែលផ្តល់តម្លៃខ្លួនកប់ពពកដល់ កីឡាកររូបនេះ។ ក៍ប៉ុន្តែ Ronaldo ទំនងជាមិនមកកាន់អាស៊ីឡើយ ព្រោះថានៅអឺរ៉ុប Ronaldo មិនប្រាកដថា មានតម្លៃខ្លួនចាញ់ Neymar និង Messi ឡើយ ម្យ៉ាងវិញ​ទៀតនោះ កំពូលតារាឆ្នើមរូបនេះ អាចបន្តគ្រងតំណែងតារាឆ្នើម រួមទាំងការប្រជែងពនរង្វាន់​ជាច្រើនផងដែរ ខណៈបីសាច្រហម Manchester United ទំនងជាជម្រើសយ៉ាងប្រសើរសម្រាប់ Cristiano Ronaldo ។

ដូច្នេះហើយ រង់ចាំមើលថា តើកំពូលតារាឆ្នើម​លំដាប់ពិភពលោក Cristiano Ronaldo ពិតជាយល់ព្រមចាកចេញពី Real Madrid ឬយ៉ាងណា? ព្រោះថា តាំងពីផ្លាស់មកកាន់ Real Madrid កាលពីឆ្នាំ ២០០៩ កន្លងមក ប្រជាប្រិយភាពរបស់កីឡាកររូបនេះ ល្បីល្បាញខ្លាំងជាងនៅអង់គ្លេស រួមទាំងទទួលបានពានង្វាន់ យ៉ាងច្រើនផងដែរ។