ខ្សែប្រយុទ្ធអ៊ុយរ៉ាហ្គាយ វ័យ ៣០ឆ្នាំ Edinson Cavani ត្រូវបានឲ្យដឹងថា កីឡាកររូបនេះ មិនបន្តនៅក្រុម Paris Saint Germain ទៀតឡើយ ខណ:ទីផ្សារដោះដូរខែមករាខាងមុខនេះ ជាពេលដែលកីឡា​កររូបនេះ ដើរចេញហើយ។

បើតាមការចុះផ្សាយរបស់ The Sun បានឲ្យដឹងថា ខ្សែប្រយុទ្ធ​ ប្រកបដោយថាមពល Edinson Cavani នឹងចាកចេញពី League1 របស់បារាំង នៅខែមករាខាងមុខនេះ។ ប្រភពខាងលើនេះដដែល បានឲ្យ​ដឹងថា Cavani នឹងមិនមកកាន់ Premier League ឡើយ តែ Napoli គឺជាកន្លែងសម្រាប់ការវិល​ត្រ​ឡប់មកវិញ របស់កីឡាកររូបនេះ។ ជាការពិតណាស់ ថ្វីបើ​បញ្ហារកាំរកូសបន្តិចបន្តួច ជាមួយ Neymar ត្រូវបានបញ្ចប់ជាស្ថាពរមែន តែ Cavani ហាក់មិនសប្បាយចិត្ត ចំពោះ ក្រុម Paris Saint Germain ដដែល ព្រោះថា ក្លិបកំពូលរបស់បារាំង​មួយ​នេះ តែងតែធ្វើអ្វីទៅតាមការចង់បានរបស់ ខ្សែប្រយុទ្ធចំណូលថ្មី Neymar ។

ម្យ៉ាងវិញទៀតនោះ Cavani ក៍មិនចង់បន្តលេង នៅ Paris Saint Germain ទៀតដែរ ដោយសារតែកីឡាករអ៊ុយរ៉ាហ្គាយរូបនេះ មិនខ្វះក្លិបចង់បានឡើយ ម្យ៉ាងការលេងនៅ Paris Saint Germain មិនប្រាកដថា ជាកន្លែងល្អ សម្រាប់រូបគេទៀតឡើយ ខណ:ក្រុមបារាំងមួយនេះ កំពុងត្រៀមនាំយកខ្សែប្រយុទ្ធឈីលី Alexis Sanchez ពីក្រុមកាំភ្លើងធំ Arsenal នៅខែមករាខាងមុខនេះ។ យ៉ាងណាវិញ ក្រុមតោខៀវ Chelsea ហាក់ដូចជាស្វាគមន៍ Cavani យ៉ាងខ្លាំង រួមទាំងមានពត៌មានល្ហិចល្ហៀងថា Real Madrid ក៍ចង់បានកីឡាករនេះដែរ តែសម្រាប់ Cavani វិញ បែរជាចង់ត្រឡប់ទៅក្លិបចាស់ Napoli វិញ។

ដូច្នេះហើយ ខ្សែប្រយុទ្ធ Edinson Cavani នឹងវិលមកកាន់ក្លិបចាស់ Napoli វិញ ដែលជាទីកន្លែងធ្វើឲ្យ​រូបគេទទួលបានភាពល្បីល្បាញ មុនការផ្លាស់ទៅកាន់ Paris Saint Germain ។