ខ្សែប្រយុទ្ធ Harry Kane បានជឿជាក់យ៉ាងមុតមាំថា ក្រុម​មាន់ខ្នាយមាស Tottenham​ Hotspur នឹងអាចឈ្នះពាន Champion League នៅរដូវកាលនេះ។

បន្ទាប់ពីអាចផ្តួលក្រុមម្ចាស់ការពារតំណែងជើងឯក Champion League អធិរាជស Real Madrid កាលពីសប្តាហ៍មុនកន្លងមក ខ្សែប្រយុទ្ធឆ្នើមកំពុងមានប្រជាប្រិយភាព Harry Kane មានក្តីសង្ឃឹមយ៉ាងមុតមាំថា ក្រុម Tottenham និងឈ្នះពាន Champion League ឆ្នាំនេះ។ ជាក់ស្តែងណាស់ ក្នុងការផ្តល់បទសម្ភាសន៍មួយជាមួយ ESPN reports ខ្សែប្រយុទ្ធអង់គ្លេសរូបនេះ បាននិយាយថា ថ្វីបើនៅ Champion League មានក្រុមខ្លាំងៗ មកពីគ្រប់លីគកំពូលនៅអឺរ៉ុបមែន តែ Spurs ហាក់កំពុងតែឈានទៅរកការឈ្នះពានឆ្នាំនេះ។

កីឡាកររូបនេះ បានបន្តទៀតថា មិនមែនក្រុមណាមួយងាយស្រួល ក្នុងការយកឈ្នះក្រុម Real Madrid នៅ Champion League ណាស់ សូម្បីក្រុមកំពូលៗ ដូចជា Bayern Munich, Juventus, Paris Saint Germain និង Barcelona និងក្រុមខ្លាំងៗនៅអង់គ្លេសជាដើម មិនប្រាកដថាលេងឈ្នះ ក្រុមអធិរាជស Real Madrid ឡើយ។ ក៍ប៉ុន្តែ យើងអាចធ្វើបានយ៉ាងល្អ ដោយមិនឲ្យ Real Madrid ធ្វើព្យុះធ្វើភ្លៀងបានឡើយ ហើយថែមទាំងបំបាក់ក្រុមការពារ​តំណែងជើងឯកនេះ ផងដែរ។

យ៉ាងណាវិញ Harry Kane នៅមិនទាន់ជឿជាក់ទាំងស្រុងថា Spurs នឹងឈ្នះ Champion League ១០០% ឡើយ ព្រោះការប្រកួត​ នៅតានតឹងបន្តទៀត ក្នុងវគ្គ១៦ក្រុមចុងក្រោយ នាពេលខាងមុខនេះ។ ក៍ប៉ុន្តែ សម្រាប់ការឈ្នះពាន Champion League នេះ Harry Kane នឹងព្យាយាមជួយ​ក្លិបឲ្យឈ្នះពានក្នុងរដូវកាលនេះឲ្យបាន ព្រោះថា រដូវកាលក្រោយ មិនប្រាកដថា រូបគេអាចបន្តលេង​នៅ Tottenham ទៀតនោះទេ ព្រោះថា Real Madrid កំពុងតាមប្រមាញ់ រូបគេយ៉ាងសកម្មបំផុត។

គួរបញ្ជាក់ផងដែរថា ក្រុម Tottenham គឺជាក្រុមបាលទាត់មួយដែល តែងតែរងជើងឯក ដូច្នេះហើយ រង់ចាំមើលថា តើ Tottenham អាចឈ្នះពាន Champion League ដូចការរំពឹងទុករបស់ខ្សែប្រយុទ្ធ Harry Kane ឬយ៉ាងណា?