លោក Nelo Vingada គ្រូបង្វឹកក្រុមបាល់ទាត់ជម្រើសជាតិម៉ាឡេស៊ី បានអះអាងថា នឹងមិនទាន់ទៅទីណាឡើយ ហើយជឿថារូបគាត់មានការគាំទ្រដើម្បីបន្តការងាររបស់ខ្លួនក្រោយពីការបរាជ័យក្នុងលទ្ធផល ៤-១ ក្រោមថ្វីដៃកូរ៉េខាងជើង នៅក្នុងប្រទេសថៃ។

គ្រូបង្វឹកសញ្ជាតិព័រទុយហ្គាល់រូបនេះ មិនទាន់ស្គាល់ជ័យជម្នះឡើយក្នុងការដឹកនាំក្រុមជម្រើសជាតិម៉ាឡេស៊ី ចាប់តាំងពីត្រូវបានតែងតាំងកាលពីខែឧសភា ពោលគឺក្នុងយុទ្ធនាការប្រកួតជម្រុះ AFC Asian Cup ឆ្នាំ 2019 ការបង្ហាញខ្លួន ៤ប្រកួត ចាញ់​ ៣ដង នឹងស្មើ ១ដង។

ថ្វីបើលទ្ធផលមិនល្អទាំងនេះក៏ដោយ Vingada បាននិយាយថាគាត់មិនព្រួយបារម្ភអំពីតំណែងរបស់គាត់ទេ។ «កិច្ចសន្យារបស់ខ្ញុំគឺសម្រាប់រយៈពេលពីរឆ្នាំ។ និយាយដោយស្មោះត្រង់ខ្ញុំខកចិត្តនឹងលទ្ធផល។ អ្នកគាំទ្រម៉ាឡេស៊ីក៏ខកចិត្តផងដែរប៉ុន្តែកីឡាករមានការខកចិត្តច្រើនជាងនេះ »។

ចុងក្រោយគ្រូវ័យ ៦៤ឆ្នាំរូបនេះបានបន្ថែមថា “ខ្ញុំនឹងមិនទៅណាទេទោះបីជាក្រុមនេះធ្វើមិនបានល្អក៏ដោយ។ ខ្ញុំមិនព្រួយបារម្ភអំពីទីតាំងរបស់ខ្ញុំទេ។ ខ្ញុំនឹងមិនបោះបង់ចោលទេ»៕