លោក Pep Guadiola អ្នកដឹកនាំក្លិបបាល់ទាត់ Manchester City នឹងបន្តការតាមទិញ អតីតកូនក្រុម​របស់លោក គឺខ្សែប្រយុទ្ធ Alexis Sanchez ពីក្រុមកាំ​ភ្លើងធំ Arsenal នៅខែមកាខាងមុខនេះ។

បើតាមការចុះផ្សាយរបស់ Daily Mail បានឲ្យដឹងថា លោក Pep Guadiola នៅតែមានបំណងចង់នាំយក Alexis Sanchez មកកាន់ Manchester City ដដែល​នៅក្នុងរដូវរំហើយ នៃការដោះដូរកីឡាករនេះ។ ជាក់ស្តែងណាស់ មួយរយៈចុងក្រោយនេះ គ្រូបង្វឹកជនជាតិ​អេស្ប៉ាញរូបនេះ ហាក់ចង់ប្រលែងខ្សែប្រយុទ្ធឈីលីរូបនេះ ទៅឲ្យក្រុម Paris Saint Germain ដែលមានបំណងចង់​បានដូចគ្នានោះ។

ក៍ប៉ុន្តែ ក្រោយពេលដែលខ្សែប្រយុទ្ធវ័យក្មេងប្រេស៊ីល​ Gabriel Jesus បានរងរបួស ក្នុងជំនួបជាមួយ Crystal Palace នោះ បានធ្វើឲ្យលោក ត្រូវតែបន្ថែមខ្សែប្រយុទ្ធមួយរូបទៀត ខណៈ Sergio Aguero មិនអាចប្រយុទ្ធតែឯងបាន​ឡើយ។ ម្យ៉ាងវិញទៀត Manchester City ត្រូវការឈ្នះពាន Premier League នៅឆ្នាំនេះ ដែលការពង្រឹងតំបន់ប្រយុទ្ធ គឺជាកត្តាសំខាន់សម្រាប់ Man City ដើម្បីឈ្នះពាននេះ។ យ៉ាងណាវិញ ការចង់​បាន Alexis Sanchez ប្រហែលជាមិនមែនជារឿងងាយស្រួល​ឡើយ ព្រោះថា ក្រុម Paris Saint Germain បានតាម​ប្រមាញ់កីឡាករឈីលីរូបនេះ ហ៉ាងស្អិតរមួត។

ហេតុនេះហើយ ក្រោយពី Gabriel Jesus ត្រូវរងរបួស ក្រុម Manchester City ត្រូវតែពង្រឹងតំបន់ប្រយុទ្ធបន្ថែម ស្របពេលដែលលោក Pep Guadiola បានសម្លឹងឃើញ Alexis Sanchez មកបំពេញបន្ថែមតំបន់កំពុងខ្វះខាត​នេះ។