មាន ឬមិនមាន Messi ក្រុម Barcelona នៅតែមិនអាចធ្វើអ្វី Celta Vigo បានដដែល

ថ្វីដ្បិតតែក្រុម Celta Vigo មិនមែនជាក្រុមខ្លាំងដូច Real Madrid, Atletico Madrid, Sevilla និង Valencia ក៍ដោយ តែក្រុមអេស្ប៉ាញមួយនេះ អាចបង្កគ្រោះថ្នាក់ដល់ក្រុមជើងខ្លាំង Barcelona បាន។

ជាក់ស្តែងណាស់ ក្នុងជំនួបជើងទី១ Copa dey Rey ក្នុងដីខ្លួនឯងយប់មិញនេះ ក្រុម Celta Vigo លេងបានត្រឹមស្មើ ១-១ ជាមួយនឹងក្រុមមិនទាន់ចាញ់ FC Barcelona ។ ក្នុងនោះដែរក្រុម Barcelona បានលាក់ជើងកីឡាករល្អៗ ដូចជា Lionel Messi និង Luis Suarez មិនដាក់លេងក្នុងការប្រកួតនេះឡើយ ខណៈ Ousmane Dembele បានចូលលេងវិញហើយ ដោយប្តូរចូលនៅនាទីទី៧៥។ បើកឆាកការប្រកួត Barcelona អាចរកគ្រាប់បាល់ ១គ្រាប់នាំមុខមុនតាំងពីនាទីទី ១៥ ដោយការស៊ុតរបស់ខ្សែប្រយុទ្ធបម្រុង Jose Arnaiz តែត្រូវបានតាមស្មើមកវិញ ដោយការស៊ុតរបស់កីឡាករ Pione Sisto នៅនាទីទី៣១។

គួរបញ្ជាក់ផងដែរថា ក្រុមទាំង២ បានធ្វើការវាយលុកគ្នាយ៉ាងខ្លាំងក្លា តែមិនអាចរកគ្រាប់បាល់បានទៀតឡើយ ដោយពួកគេសុទ្ធសឹងមានឱកាសច្រើនក្នុងការរកគ្រាប់បាល់បញ្ចូលទីបន្ថែមទៀត។ តាមរយៈការប្រកួតនេះ បង្ហាញឲ្យឃើញថា ក្រុម Barcelona នៅតែមិនអាចយកឈ្នះក្រុម Celta Vigo បានដដែល ខណៈជើងទី២ ត្រូវលេងក្នុងដីរបស់ Barcelona ក៍ដោយ តែការជួបគ្នា ២ប្រកួតចុងក្រោយក្នុងរដូវកាលថ្មីនេះ ពោលនៅ Laliga លេងក្នុងដី Barcelona បានត្រឹម ២-២ ដែលមានវត្តមានតារាឆ្នើម Lionel Messi និង Luis Suarez និង Copa dey Rey ក្នុងដី Celta Vigo បានត្រឹម ១-១ ទៀត។

ដូច្នេះហើយ គិតត្រឹមរដូវកាលនេះ ក្រុម Barcelona លេងមាន Messi ឬក៍អត់ Messi នៅតែមិនអាចយកឈ្នះក្រុម Celta Vigo បានដដែល ខណៈជើងទី២ នឹងក្លាយជាការប្រកួតកាត់ក្តីថា Barcelona អាចឈ្នះ ឡើងទៅកាន់វគ្គបន្ត ឬក៍ជា Celta Vigo ជាអ្នកឡើងទៅកាន់វគ្គបន្ត។