ខ្សែបម្រើប្រយុទ្ធកូរ៉េខាងត្បូង Heung-Min Son បានធ្វើឲ្យប្រជាជាតិអាស៊ីកំពុងតែមានភាពល្បីរន្ទឺយ៉ាងខ្លាំង ក្រោយពីកីឡាកររូបនេះ កំពុងបង្ហាញសមត្ថភាពយ៉ាងល្អ ឲ្យក្រុមមាន់ខ្នាយមាស Tottenham Hotspur នាពេលបច្ចុប្បន្ននេះ។

ជាក់ស្តែងណាស់ ប្រជាប្រិយភាព របស់ Heung-Min Son នាពេលបច្ចុប្បន្ននេះ បានអង្រួនក្របខ័ណ្ឌកំពូល Premier League ឲ្យងាកមកចាប់អារម្មណ៍លើ​កីឡាករនៅតំបន់អាស៊ី។ គិតត្រឹមសប្តាហ៍នេះ Heung-Min Son ស៊ុតបាន ១០គ្រាប់ហើយនៅ Premier League ក្នុងរដូវកាលនេះឲ្យក្រុម Spurs ដោយ​មិនគិតគ្រាប់បាល់ស៊ុតនៅ FA Cup, Carabao Cup និង Champion League ឡើយ។

តែអ្វីដែលគួរឲ្យកត់សម្គាល់នោះគឺ​ សមត្ថភាពយ៉ាងល្អរបស់​កីឡាករកូរ៉េខាងត្បូងរូបនេះ បានធ្វើឲ្យមានការចាប់អារម្មណ៍យ៉ាងច្រើន ពីអ្នកទស្សនាជុំវិញពិភពលោក ជាពិសេសនោះ ការប្រកួតជាមួយក្រុម Huddersfield Town យប់មិញនេះ Heung-Min Son បនបង្ហាញសមត្ថភាពអូសបាល់​យ៉ាងល្អ ដាច់កីឡាករគូបដិបក្ខដល់ទៅ ៥ នាក់ រួមទាំងការអូសបាល់ផុតអ្នកចាំទី រួចស៊ុតបញ្ចូលទីផងដែរ និងសកម្មភាពផ្សេងៗទៀត ដែលបង្ហាញពីទេពកោសល្យ​យ៉ាងល្អរបស់កីឡាករអាស៊ីរូបនេះ។

យ៉ាងណាមិញ បើប្រៀបធៀប រវាង Heung-Min Son និងតារារៀមច្បង Park Ji Sung ដែលធ្លាប់មានភាពល្បីល្បាញ​នៅក្រុមបីសាចក្រហម Manchester United នោះយើងឃើញថា Heung-Min Son ហាក់ល្អជាងតារារៀមច្បង ព្រោះថា កីឡាកររូបនេះ មានសមត្ថភាពទាំងការអូសបាល់, បោះបាល់ និងស៊ុតយ៉ាងប្រសើរជាពិសេសនោះ ប្រជាប្រិយភាពល្បីល្បាញជាង Park Ji Sung ។

ដូច្នេះហើយ Heung-Min Son កំពុងតែអង្រួនក្របខ័ណ្ឌកំពូលអង់គ្លេស Premier League ឲ្យងាកមកសម្លឹងឃើញ កីឡាករនៅតំបន់អាស៊ី ជាបន្តទៀត។

https://www.youtube.com/watch?v=s30E38hC8Kk