បន្ទាប់ពីមានការបែកធ្លាយពត៌មាន ដែល Neymar ចង់ត្រឡប់មកកាន់ ក្រុម Barcelona វិញនោះ នៅពេលនេះដែរខ្សែបម្រើ​ក្រូអាត Ivan Rakitic បានធ្វើការ​ស្វាគមន៍ចំពោះ ការវិលត្រឡប់មកវិញ របស់អតីតមិត្តរួមក្រុមរបស់គេ រូបនេះ មកកាន់ Barcelona វិញ។

ជាក់ស្តែងណាស់ បើតាមការចុះផ្សាយរបស់ទូរទស្សន៍ ESPN បានឲ្យដឹងថា Ivan Rakitic មានការសប្បាយចិត្តយ៉ាងខ្លាំង នៅពេលដែលទទួលដំណឹងថា Neymar ចង់វិលមកកាន់ Barcelona វិញនៅរដូវកាលក្រោយនេះ។ Rakitic បានថ្លែងប្រាប់តាមរយៈ ESPN ថា ក្រុម Barcelona ស្វាគមន៍ជានិច្ចចំពោះ វត្តមាននៃការវិលមកវិញ របស់ Neymar ថ្វីបើយើងបានទិញកីឡាករជាច្រើនមក​កាន់ក្លិបក៍ដោយ តែសម្រាប់កីឡាករដ៍ល្អដូច Neymar បែបនេះ យើងមិនបាន​មើលរំលងឡើយ។

ម្យ៉ាងវិញទៀត បើសិនជា Neymar ពិតជាត្រឡប់មកកាន់ Barcelona មែននោះ នោះក្លិបនឹងកាន់តែខ្លាំងពិបាករកគូប្រៀបជាក់ជាមិនខាន ព្រោះថាក្រៅពី Lionel Messi ដែលលេងបាល់ដូចម៉ាស៊ីននោះ យើងមាន Neymar ចាប់ដៃគូយ៉ាងល្អ ជាមួយមិត្តយល់ចិត្តរបស់គេ Philippe Coutinho រួមទាំងខ្សែប្រយុទ្ធមុតស្រួចរបស់យើង Luis Suarez ឃើញថា ទម្រង់លេងរបស់ក្លិប ពិតជាខ្លាំងក្លាជាក់ជាមិនខាន។

ដូច្នេះហើយ តាមរយៈសម្តី​របស់ Ivan Rakitic បានបង្ហាញឲ្យឃើញថា​ ក្រុម Barcelona មិនបានបដិសេធ ដំណើរត្រឡប់មកវិញ របស់ Neymar ក៍ព្រោះតែរូបគេចាកចេញពីក្លិប កាលពីរដូវក្តៅកន្លងមកឡើយ។ ផ្ទុយទៅវិញ ក្រុម Barcelona ចង់ឃើញវត្តមានរបស់ Neymar ត្រឡប់មកកាន់អេស្ប៉ាញ​វិញ ដើម្បីធ្វើព្យុះធ្វើភ្លៀង ជាថ្មីម្តងទៀត។