ក្រោយពីក្រុម Real Madrid ហាក់ងាករេ ចំពោះការតាម​ប្រមាញ់ ខ្សែប្រយុទ្ធប្រេស៊ីល Neymar ពីក្រុម Paris Saint Germain នៅមួយយៈចុងក្រោយនេះ ក្រុមជើងខ្លាំង ពីរនៅអង់គ្លេស កំពុងតែប្រជែងគ្នាយ៉ាង​ខ្លាំង ក្នុងការនាំយក កីឡាករកំពូលរូបនេះ។

បើតាមការចុះផ្សាយរបស់ Mundo Deportivo បានឲ្យដឹងថា ក្រុមបីសាចក្រហម Manchester United និងក្រុមមេឃខៀវ Manchester City ចាប់អារម្មណ៍ ប្រជែងទិញ Neymar ជាមួយក្រុមយក្ស​អេស្ប៉ាញ Real Madrid ។ ក្រុមអង់គ្លេសទាំង២ នេះ កំពុងតែ រៀបចំខ្លួន ក្នុងការជួបក្រុម Paris Saint Germain ដើម្បីនិយាយថ្លៃទាក់ទងនឹងការផ្ទេរ Neymar មកកាន់អង់គ្លេស នៅរដូវកាលក្រោយ។

ថ្វីដ្បិត តែ Real Madrid បានបង្ហាញចំណាប់អារម្មណ៍ចង់បាន Neymar យ៉ាងខ្លាំង នាពេលកន្លងមក រួមទាំងធ្លាប់បង្ហាញទំហំទឹកប្រាក់ដល់ទៅ ៣០០លានអឺរ៉ូ ក្នុងការទិញកីឡាកររូបនេះ ក៍ដោយ ក៍ប៉ុន្តែមួយរយៈចុងក្រោយនេះ Real Madrid បានងាកទៅចាប់អារម្មណ៍កីឡាករកំពុងឡើងជើង Mohamed Salah របស់ក្រុមហង្សក្រហម Liverpool វិញ។ ការស្ងប់ស្ងាត់ នៃការចង់បាន Neymar នេះហើយ បានធ្វើឲ្យក្រុមត្រកូល Manchester ទាំង២ ចាប់យក​ឱកាស ក្នុងការប្រជែងគ្នា ដើម្បីទិញយកខ្សែប្រយុទ្ធ​ប្រេស៊ីលរូបនេះ មកកាន់ Premier League ។

យ៉ាងណាវិញ ការចាប់អារម្មណ៍ ចង់បាន Neymar របស់ក្រុម Manchester United, Manchester City និង Real Madrid នេះដែរ នៅមិនទាន់ទទួលបានភ្លើង​ខៀវ ពីក្រុម Paris Saint Germain ឡើយ ព្រោះថាក្លិបបារាំងមួយនេះ ចង់ឈ្នះ Champion League សិនទើបលក់ Neymar ជាក្រោយ។