Post News Media ព័ត៌មានកីឡា Roma ធ្វើឲ្យ ...

Roma ធ្វើឲ្យ Barcelona ដាច់ផ្ងារយ៉ាងឈឺចាប់ (វីដេអូ)

ក្រុម AS Roma បានធ្វើឲ្យមានការភ្ញាក់ផ្អើលយ៉ាងខ្លាំង ក្នុងពិភពបាល់ទាត់ ដោយបានវាយបកទម្លាក់ក្រុម Barcelona ឲ្យជ្រុះចេញពីក្របខ័ណ្ឌ UEFA Champion League ត្រឹមវគ្គ ៨ក្រុមចុងក្រោយនេះ ក្រោយពីបំបាកក្រុម Barcelona មិនឲ្យតដៃបានក្នុងលទ្ធផល ៣-០ ។

នេះគឺជារឿងដ៍ភ្ញាក់ផ្អើលមួយ ដែលមិនគួរឲ្យជឿឡើយ សម្រាប់ក្រុមយក្ស​អេស្ប៉ាញ Barcelona ដែលត្រូវធ្លាកក្រោមថ្វីជើង ក្រុមអ៊ីតាលី នៅវគ្គ ៨ក្រុមចុង​ក្រោយ Champion League រយ:ពេល២ឆ្នាំជាប់ៗគ្នាបែបនេះ។ ជាក់ស្តែងណាស់ Roma ពិតជាធ្វើបានយ៉ាងល្អ បើទោះបីជាត្រូវក្រុម Barcelona យកឈ្នះកាលជើងទី១ ៤-១ ក៍ដោយ តែក្រុមអ៊ីតាលីមួយនេះ បានវាយបកយ៉ាង​ខ្លាំង​ក្លាមកវិញ ដោយយកឈ្នះក្រុម Barcelona ៣-០ បន្តឡើងទៅកាន់វគ្គពាក់​កណ្តាលផ្តាច់ព្រ័ត្រទៀត។

៣ គ្រាប់ របស់ក្រុម ចចក Roma រកបានដោយ ខ្សែ​ប្រយុទ្ធបូស្នៀ Edin Dzeko នៅនាទីទី៦, ការទាត់បាល់ ១១ម៉ែត្ររបស់កីឡាករ​វ័យចំណាស់អ៊ីតាលី Daniele De Rossi នៅនាទីទី៥៨ និងការតែតបញ្ចូលទី​យ៉ាងស្អាតរបស់កីឡាករ​ Konstantinos Manolas នៅនាទីទី៨២។ តាមរយ:លទ្ធផល ៣-០ នេះដែរ បានធ្វើឲ្យក្រុម Roma ឡើងទៅកាន់វគ្គពាក់​កណ្តាលផ្តាច់ព្រ័ត្រ Champion League ខណ:ក្រុម Barcelona វិញ បានត្រឹមហាលអាវត្រឡប់ទៅកាន់ អេស្ប៉ាញវិញ ដោយភាពឈឺចាប់បំផុត។ យ៉ាងណាវិញ ក្នុងរយ:ពេល ២ឆ្នាំកន្លងមកនេះ ក្រុម Barcelona បានធ្លាក់ក្រោម​ថ្វីជើងក្រុមអ៊ីតាលី ក្នុងវគ្គ៨ក្រុមចុងក្រោយនេះ ទាំង២ឆ្នាំមកហើយ ពោលកាលពី​ឆ្នាំមុន ធ្លាក់ក្រោមថ្វីជើងក្រុមសេះបង្កង់ Juventus និងឆ្នាំនេះវិញ ក្រោមថ្វីជើង​ក្រុមចចក Roma ម្តង។

បើយើងក្រឡេកមើលលទ្ធផលដែល Roma បំបែកពងមាន់ក្រុម Barcelona នេះដែរ វាស្រដៀងទៅនឹងឆ្នាំមុន នាវគ្គ ១៦ក្រុមចុងក្រោយដែល Barcelona ទម្លាក់ Paris Saint Germain អ៊ីចឹងដែរ ខណ:ជើងទី១ Paris Saint Germain លុត Barcelona ចាស់ដៃ ៤-០ ខណ:ជើងទី២វិញ Barcelona បានវាយបកយ៉ាងចាស់ដៃវិញ ៦-១ ។