លើកនេះ គឺមិនដូចរដូវក្តៅកន្លងមកឡើយ ខណៈខ្សែបម្រើ​អេស្ប៉ាញ Ander Herrera សប្បាយចំពោះក្រុមយក្សអេស្ប៉ាញ Barcelona ដែលមានបំណងចង់បានរូបគេ។

វាហាក់ដូចជាការប្រែប្រួលបន្តិច សម្រាប់ Herrera ដែលធ្លាប់ធ្វើការបដិសេធ ក្នុងការផ្លាស់ទៅកាន់ក្រុម Barcelona កាលពីរដូវក្តៅកន្លងមក។ យ៉ាងណាវិញ បើតាមការចុះផ្សាយរបស់ ESPN reports បានឲ្យដឹងថា ខ្សែបម្រើ Ander Herrera កំពុងតែចង់ផ្លាស់ទៅកាន់ក្រុម​ Barcelona យ៉ាងខ្លាំង។ ជាការពិតណាស់ ក្រុម Barcelona បានធ្វើការចាប់អារម្មណ៍ចង់បាន Herrera ម្តងទៀត នៅខែមករាខាងមុខនេះ ស្របពេលដែល Herrera លែងរឹងរូសដូចរដូវក្តៅទៀតហើយ។

មូលហេតុដែល Herrera មិនចង់បន្តនៅ Man Utd ទៀតនោះ ដោយសារតែ​ បច្ចុប្បន្ននេះ ខ្សែបម្រើអេស្ប៉ាញរូប​នេះ មិនស្ថិតក្នុងជម្រើស ១១នាក់ដំបូងរបស់លោក Jose Mourinho ឡើយ ប្រសិនបើ Nemanja Matic និង Paul Pogba មិនរបួសនោះ។ ម្យ៉ាងវិញទៀត Man Utd កំពុងតែត្រៀមនាំកីឡាករថ្មីចូលបន្ថែមទៀត ដែលកាន់តែគម្រាមដល់ តំណែង របស់ Ander Herrera នៅ Man Utd ។ យ៉ាងណាវិញ Herrera ជឿជាក់ថា ការផ្លាស់ទៅកាន់ Barcelona អនាគត់របស់គេ នឹងភ្លឺស្វាង​ជាងមុន Andre Iniesta ជិតចូលនិវត្តន៍ទៅហើយ អាចផ្តល់ឱកាសឲ្យ Herrera ទៅជំនួសតំណែងនេះ។

ដូច្នេះហើយ ទំនងជានៅទីផ្សារដោះដូរកីឡាករ ខែមករាខាងមុខនេះ Ander Herrera នឹងផ្លាស់ទៅកាន់ក្រុម Barcelona ជាក់ជាមិនខាន ប្រសិនបើ Barcelona ពិតជាដាក់សំណើរទិញ តាមការចង់បានរបស់ក្លិបយក្សអេស្ប៉ាញមួយនេះ។