ការតវ៉ាក្ដីរបស់ក្លឹប Real Madrid និង Atletico Madrid មិនបានជោគជ័យឡើយ ពោលគឺត្រូវ FIFA ច្រានចោលទាំងអស់ ខណៈដែលបម្រាមហាមទិញដូរកីឡាកររហូតដល់ឆ្នាំ២០១៨ នឹងនៅរក្សាដដែល។

រឿង FIFA ដាក់បម្រាមក្លឹបទាំងពីរខាងលើនេះ កើតឡើងតាំងពីរដូវកាលមុនមកម្ល៉េះ ខណៈដែលការតវ៉ាចេះតែមានរហូតមក ដោយក្លឹប Real Madrid និង Atletico Madrid សំអាងថាពួកគេបរិសុទ្ធ មិនបានប៉ះពាល់រឿងទិញកីឡាករក្រោមអាយុ១៨ឆ្នាំពីក្រៅទ្វីបអឺរ៉ុបនោះទេ។ យ៉ាងណាមិញ កាលពីយប់មិញនេះ FIFA បានចេញមកបញ្ជាក់ហើយថា ការតវ៉ាទាំងអស់មិនមានប្រសិទ្ធភាពឡើយ ហើយបម្រាមមិនឱ្យទិញដូរកីឡាកររហូតដល់ឆ្នាំ២០១៨ នឹងកើតមានឡើងសម្រាប់ក្លឹបទាំងពីរនេះ។

បន្ថែមពីលើនេះទៀត FIFA ក៏បានពិន័យជាប្រាក់ផងដែរ ពោលគឺ Atletico Madrid ពិន័យ ៦២២ ០០០ ផោន និង Real Madrid ពិន័យ ២៤៩ ០០០ផោន។

សូមបញ្ជាក់ថាច្បាប់ FIFA បានចែងថាក្លឹបទាំងអស់មិនអាចទិញដូរកីឡាករក្រោមអាយុ១៨ឆ្នាំបានឡើយ ដែលនេះជាការគាំពារសិទ្ធមនុស្សមួយ។ ប៉ុន្តែការដោះដូរអាចកើតមានបាន ប្រសិនបើកីឡាករក្រោមអាយុ១៨ឆ្នាំស្ថិតក្នុងលក្ខខណ្ឌ៣យ៉ាងគឺ៖

១. ឪពុកម្ដាយនៃកីឡាកររូបនោះ ត្រូវផ្លាស់ទៅក្លឹបថ្មីដែលបានទិញកូនរបស់ខ្លួន ដើម្បីជាការតាមថែរក្សាកូន
២. ក្លឹបទាំងពីរដែលធ្វើការដោះដូរកីឡាករក្រោមអាយុ១៨ឆ្នាំនោះ គឺនៅតំបន់អឺរ៉ុបដូចគ្នា ហើយកីឡាករម្នាក់នោះត្រូវមានអាយុចន្លោះពី១៦ទៅ១៨ឆ្នាំ។ ខណៈដែលក្លឹបទិញនោះ ត្រូវធានាការស្នាក់នៅ រៀនសូត្រ និងផ្គត់ផ្គង់គ្រប់បែបយ៉ាង។
៣. កីឡាករ នៅចម្ងាយតែ១០០គីឡូម៉ែត្រពីក្លឹបប៉ុណ្ណោះ

ដោយឡែកហេតុផលដែល FIFA ពិន័យក្លឹប Real Madrid និង Atletico Madrid នោះ គឺដោយសារតែរកឃើញថា Real បានប្រើកីឡាករក្រោមអាយុ១៨ឆ្នាំចន្លោះពីឆ្នាំ ២០០៥ ដល់២០១៤ ចំណែកឯ AT Madrid វិញចន្លោះឆ្នាំ២០០៧ ដល់២០១៤ដូចគ្នា៕