លោក Fabio Capello អតីតគ្រូបង្វឹកក្រុមជម្រើសជាតិអង់គ្លេសបាននិយាយថា Cristiano Ronaldo ចូលលេងទាំងមិនជាន់ជាពីរបួស គឺជាបញ្ហាដែលធ្វើឱ្យក្រុម Real Madrid ទាំងមូលលេងមិនល្អ បណ្ដោយឱ្យលទ្ធផលចេះតែស្មើប៉ុន្មានប្រកួតជាប់គ្នាមកនេះ។

 Ronaldo បានរងរបួសតាំងពីពេលលេងឱ្យក្រុមជម្រើសជាតិព័រទុយហ្គាល់ក្នុងពានរង្វាន់ Euro 2016 មកម្ល៉េះ។ ខណ:ដែលរបួសនោះបានធ្វើឱ្យរូបគេខកខានចូលលេងឱ្យក្លឹបអាជីព Real Madrid ប៉ុន្មានប្រកួតពេលបើករដូវកាល ហើយទើបតែបានចូលលេងវិញនៅពេលថ្មីៗកន្លងទៅនេះទេ។ វត្តមានចូលលេងជាថ្មីរបស់អតីតខ្សែប្រយុទ្ធឆ្នើម Manchester United រូបនេះ បែរជាមិនបានធ្វើឱ្យ Real Madrid ខ្លាំងទេ បែរជាទទួលបានលទ្ធផលស្មើ៤ប្រកួតជាប់ៗគ្នាមកហើយ។

 ទាក់ទិននិងរឿងនេះដែរ លោក Fabio បានបង្ហាញចំណាប់អារម្មណ៍ថាដោយសារតែការចូលលេងទាំងរបួសមិនទាន់ជាសះស្បើយ១០០%នេះហើយ ទើបធ្វើឱ្យ Ronaldo ហាក់ធ្លាក់ទម្រង់លេង និងមិនអាចជួយក្រុមបានច្រើនក្នុងការប្រកួតដែលមានវត្តមានរូបគេ។

 រដូវកាលថ្មីនៅ La Liga នេះ ម្ចាស់ពានរង្វាន់កីឡាករល្អនៅតំបន់អឺរ៉ុបខាងលើបានបង្ហាញខ្លួនឱ្យ Real Madrid បាន៤ប្រកួតមកហើយ ដោយរកគ្រាប់បាល់បាន១គ្រាប់និងបង្កើតឱកាសស៊ុតបានតែ៥ដងប៉ុណ្ណោះ៕