ក្រុមហ៊ុនបច្ចេកវិជ្ជាយក្សរបស់ចិន Huawei Technologies ដែលផលិតផលបរិក្ខាតភ្ជាប់បណ្តាញទូរគមនាគមន៍ របស់ក្រុមហ៊ុនមួយនេះ ត្រូវបានហាមឃាត់មិនឱ្យចរាចរនៅលើទឹកដីអាមេរិក ដោយសារកង្វល់ផ្នែកសន្តិសុខនោះ កំពុងនាំចូលស្មាតហ្វូនលំដាប់កំពូលរបស់ខ្លួន សម្រាប់អ្នកប្រើប្រាស់នៅអាមេរិកជាលើកដំបូង។ ប៉ុន្តែក្រុមហ៊ុន ផលិតស្មាតហ្វូនលំដាប់ថ្នាក់ទី ៣ ក្នុងលោក ឈរពីក្រោយក្រុមហ៊ុន Samsung និង Apple នេះ កំពុងប្រឈមឧបសគ្គជាច្រើន ដែលអាចនាំឱ្យមានការរាំងស្ទះផ្លូវរបស់ខ្លួន ឆ្ពោះទៅរកភាពជោគជ័យ ក្នុងទីផ្សារស្មាតហ្វូននៃប្រទេសមហាអំណាចមួយនេះ។

ក្រុមហ៊ុនបណ្តាញទូរស័ព្ទក្នុងស្រុក ដែលក្តោបក្តាប់ការចែកចាយទូរស័ព្ទចល័តជាង ៨០% កំពុងស្ទាក់ស្ទើរ ក្នុងការសហការជាមួយ Huawei ដោយសារតែមិនទុកចិត្តលើបញ្ហាសន្តិសុខជាតិ ពាក់ព័ន្ធទៅនឹងផលិតផល បរិក្ខារទូរគមនាគមន៍ និងកេរ្តិ៍ឈ្មោះម៉ាកសញ្ញារបស់ក្រុមហ៊ុន ដែលនៅទាបនៅឡើយ។

កាលពីឆ្នាំ ២០១២ រដ្ឋាភិបាលទីក្រុងវាស៊ីនតោន បានណែនាំឱ្យក្រុមហ៊ុនបណ្តាញទូរស័ព្ទចល័ត ក្នុងប្រទេស ជៀសវាងប្រើប្រាស់បរិក្ខារតភ្ជាប់បណ្តាញនាំចូលពីក្រុមហ៊ុន Huawei ក្នុងបណ្តាញទូរគមនាគមន៍របស់ពួកគេ ដោយសារបារម្ភថា រដ្ឋាភិបាលចិនអាចលួចបង្កប់គ្រឿងឈ្លបយកការលើរដ្ឋាភិបាលអាមេរិក។ ទោះយ៉ាងណា ការចោទប្រកាន់នេះ ត្រូវបានក្រុមហ៊ុនទាត់ចោល ហើយអះអាងថា Huawei គឺជាក្រុមហ៊ុនប្រតិបត្តិឯករាជ្យ។

ដោយឡែក ឧបសគ្គដ៏ធំមួយផ្សេងទៀតនោះគឺ ឧបករណ៍បច្ចេកទេស សម្រាប់បំពេញស្តង់ដាប្រព័ន្ធ Cellular របស់អាមេរិក អាចនឹងមានតម្លៃខ្ពស់ សម្រាប់ក្រុមហ៊ុនចិន៕
ប្រភពព័ត៌មាន៖ wsj