ផលិតផលក្លែងក្លាយបានដាក់ទម្ងន់ទុក្ខដ៏ធំលើក្រុមហ៊ុន Amazon អស់ពេលជាច្រើនឆ្នាំមកហើយ រហូតដល់កើត មានបណ្តឹងថ្មីមួយប្តឹងថា ផ្សារអនឡាញរបស់ក្រុមហ៊ុនលក់ឆ្នាំងសាកថ្ម iPhone ផ្លូវការពីក្រុមហ៊ុន Apple ក្លែងក្លាយរហូតដល់ ៩០%។ ដោយសារតែបញ្ហានេះ ក្រុមហ៊ុនបាននិងកំពុងដាក់ចេញនូវវិធានការប្រឆាំងនឹងទំនិញ បោកប្រាស់ទាំងអស់នោះ ក្នុងគោលបំណងលុបបំបាត់ក្តីកង្វល់ទាំងអ្នកលក់ និងអ្នកទិញ តាមរយៈការសម្អាត ផលិតផលក្លែងក្លាយចេញពីទីផ្សារអនឡាញរបស់ខ្លួន។ នេះបើយោងតាមសេចក្តីរាយការណ៍ពីទីភ្នាក់ងារព័ត៌មាន Bloomberg ។

ក្នុងសេចក្តីរាយការណ៍ដដែល ក្រុមហ៊ុនផ្សារអនឡាញធំបំផុតក្នុងលោកមួយនេះ បានទទួលស្គាល់បញ្ហាទំនិញ ក្លែងក្លាយដែលកំពុងចោទឡើងកាន់តែធ្ងន់ ទាមទារឱ្យខ្លួនត្រូវតែចាត់វិធានការប្រយុទ្ធប្រឆាំងជាបន្ទាន់ ហើយវិធានការនោះ ត្រូវបានក្រុមហ៊ុនចាត់ទុកជា “គោលដៅធំចម្បងសម្រាប់ឆ្នាំក្រោយ” ។

សេចក្តីរាយការណ៍ដដែលបានបន្ថែមថា ក្រុមហ៊ុន Amazon បាននិងកំពុងរៀបចំឱ្យមានការចុះបញ្ជីឈ្មោះថ្មីមួយ ដើម្បីទប់ស្កាត់ការលក់ដូរទំនិញក្លែងក្លាយ និងកំពុងធ្វើការជាមួយក្រុមហ៊ុនផ្សេងៗ ដើម្បីឱ្យពួកគេចុះឈ្មោះ ក្នុងបញ្ជីសម្រាប់ការដាក់លក់ទំនិញលើគេហទំព័ររបស់ខ្លួន ទោះបីជាក្រុមហ៊ុនទាំងនោះ មិនមានគម្រោង លក់មុខទំនិញណាមួយក៏ដោយ។ បន្ទាប់មក អ្នកលក់រាយគ្រប់រូបត្រូវសុំសិទ្ធិពីក្រុមហ៊ុនផលិតផលដើមជាមុនសិន មុននឹងពួកគេអាចដាក់លក់ផលិតផលរបស់ក្រុមហ៊ុនទាំងនោះ។

Amazon ក៏បាននិងកំពុងសាកល្បងវិធានការថ្មីនេះជាមួយក្រុមហ៊ុន Nike ក៏ដូចជាក្រុមហ៊ុនដទៃផ្សេងទៀតដែរ ដើម្បីរៀបចំបញ្ជីឈ្មោះថ្មីនោះ ហើយគ្រោងនឹងចរចាជាមួយក្រុមហ៊ុនគោលដៅរាប់ពាន់បន្ថែមទៀតនៅឆ្នាំក្រោយ ដើម្បីព្យាយាមបញ្ចុះបញ្ចូលពួកគេឱ្យដាក់លក់ផលិតផល នៅលើទីផ្សារអនឡាញរបស់ខ្លួន។

កន្លងមក មានក្រុមហ៊ុនមួយចំនួនស្ទាក់ស្ទើរ ក្នុងការដាក់លក់ទំនិញតាមរយៈក្រុមហ៊ុន Amazon ដោយសារមានការកេងបន្លំទំនិញក្លែងក្លាយ ក្នុងចំនួនដ៏ច្រើន។ ជាក់ស្តែងគឺមានក្រុមហ៊ុន NFL និង MLB ដែលមិនយល់ព្រមដាក់លក់ទំនិញរបស់ពួកគេនៅលើគេហទំព័រ Amazon ដោយសារតែវត្តមាននៃផលិតផល ក្លែងក្លាយ៕