ក្រុមហ៊ុន Samsung បានបញ្ជាក់ថា កំណែប្រព័ន្ធប្រតិបត្តិការ Android 7.1.1 សម្រាប់ Galaxy S7 និង S7 Edge នឹងដាក់ចេញឱ្យអ្នកប្រើប្រាស់កែឡើង នៅខែមករា ខាងមុខនេះហើយ។ ការបញ្ជាក់នេះ បានធ្វើឡើងក្នុងកំណត់ចំណាំ Beta មួយរបស់កម្មវិធី Galaxy Beta Program។
ក្រុមហ៊ុនបានប្រកាសផងដែរថា៖ «យើងនឹងខំប្រឹងប្រែងឱ្យអស់លទ្ធភាពដើម្បីដាក់ចេញនូវប្រព័ន្ធ Android Nougat កំណែថ្មី ជូនដល់អតិថិជនដែលកំពុងប្រើប្រាស់ទូរស័ព្ទដៃ Galaxy S7 និង S7 Edge ក្នុងខែមករា ឱ្យទាល់តែបាន»។

តាមរយៈការពោលបែបនេះ គឺច្បាស់ហើយថា Samsung កំពុងព្យាយាមបញ្ជៀសការប្រថុយប្រថានរបស់ខ្លួន ចំពោះបញ្ហាផ្សេងៗដែលអាចកើតឡើងជាយថាហេតុ ហើយវាក៏បង្ហាញថា Samsung ទំនងជាកំពុងខំប្រឹងដោះស្រាយបញ្ហាដែលនៅសេសសល់ឱ្យបានដាច់ស្រេចសិន មុននឹងដាក់វាឱ្យអតិថិជនប្រើប្រាស់។ បើដូច្នេះមែន ការរង់ចាំយូរបន្តិចបន្ថែមទៀតដើម្បីទទួលបានកំណែថ្មីដ៏ល្អឥតខ្ចោះមួយ គឺប្រសើរជាងការទទួលបាននូវកំណែថ្មីឆាប់រហ័ស ដែលនៅតែភ្ជាប់មកជាមួយបញ្ហាដដែលជាដដែល៕

ប្រភពព័ត៌មាន៖ androidauthority