ព័ត៌មានបច្ចេកវិទ្យា

Facebook ប្រឈមបណ្តឹងផ្លូវច្បាប់ ២$ ពាន់លាន ក្រោមបទចោទលួចបច្ចេកវិជ្ជាគន្លឹះប្រើប្រាស់លើ Oculus

ក្រុមហ៊ុន Facebook កំពុងរងនូវបណ្តឹងផ្លូវច្បាប់មួយ ដែលបានចាប់ផ្តើមបើកការជំនំជម្រះនៅថ្ងៃច័ន្ទម្សិលមិញ ពីសំណាក់ក្រុមហ៊ុនផលិតវីដេអូហ្គេម ZeniMax ក្រោមបទចោទថា ក្រុមហ៊ុនដែលជាម្ចាស់របស់ក្រុមហ៊ុន Oculus មួយនេះ បានលួចចម្លងផ្នែកមួយចំនួននៃបច្ចេកវិជ្ជាសំខាន់របស់ខ្លួន ហើយប្រឌិតរឿងរ៉ាវផ្សេងៗដើម្បីបិទបាំងការពិត។

ក្រុមហ៊ុនបណ្តាញសង្គមដែលបានទិញយកក្រុមហ៊ុន Oculus តម្លៃ ២ ពាន់លានដុល្លារ ក្នុងឆ្នាំ ២០១៤ បានច្រានចោលការចោទប្រកាន់ខាងលើ ដែលអាចឈានទៅដល់ការកោះហៅនាយកប្រតិបត្តិក្រុមហ៊ុន គឺលោក Mark Zuckerberg ចូលខ្លួនផ្តល់សក្ខីកម្មក្នុងតុលាការ។

នៅក្នុងឯកសារតុលាការ ក្រុមហ៊ុន ZeniMax បាននិយាយថា Facebook បានទិញយកក្រុមហ៊ុន Oculus ទាំងដឹងច្បាស់ថា កម្មសិទ្ធិបញ្ញាស្នូលរបស់ក្រុមហ៊ុននេះមួយចំនួន ទាំងផ្នែក Hardware និង Software សម្រាប់ប្រើប្រាស់លើវ៉ែនតាប្រចក្សនិម្មិត (Virtual Reality) Oculus ត្រូវបានលួចចម្លងពីក្រុមហ៊ុន ZeniMax ដោយបុគ្គលិកជំនាញម្នាក់ឈ្មោះ Jonh Carmack ដែលបានចាកចេញពីក្រុមហ៊ុនរបស់ខ្លួន ទៅធ្វើការឱ្យក្រុមហ៊ុន Oculus ក្នុងឆ្នាំ ២០១៣។

នាយកប្រតិបត្តិក្រុមហ៊ុន Facebook និង Oculus បានច្រានចោលបទចោទនេះ ហើយថា ការលើកឡើងរបស់ក្រុមហ៊ុន ZeniMax ដើម្បីធ្វើការប្តឹងទារសំណងទឹកប្រាស់ចំនួន ២ ពាន់លានដុល្លារនោះ គឺជារឿងមិនពិត៕
ប្រភពព័ត៌មាន៖ forbes

មតិយោបល់