ឥឡូវនេះ លោកអ្នកដែលកំពុងប្រើប្រាស់ទូរសព្ទដៃ iPhone ឬ iPad អាចចាប់​យកបទពិសោធន៍ជាមួយជំនួយការសំឡេងឌីជីថលរបស់ក្រុមហ៊ុន Google គឺ Google Assistant បានហើយ ជាមួយការរចនា និងដំណើរការស្ទើរតែដូចគ្នាទៅនឹងស្មាតហ្វូន និងថេប្លេតដើរដោយប្រព័ន្ធ Android។
វត្តមានរបស់មុខងារគូប្រជែង Siri របស់ក្រុមហ៊ុន Apple នៅលើ App Store នេះ គឺលេចឡើងបន្ទាប់ពីវេទិកាជំនួបក្រុមអ្នកអភិវឌ្ឍកម្មវិធីប្រចាំឆ្នាំ Google I/O របស់ក្រុមហ៊ុនអិុនធើណែតយក្សអាមេរិកកាលពីថ្ងៃម្សិលមិញនេះ។

មែនទែនទៅ iPhone គឺត្រូវបានភ្ជាប់មករួចជាស្រេចទៅហើយនូវជំនួយការសំឡេងឌីជីថល Siri ដ៏ល្បីល្បាញ។ ប៉ុន្តែ ហេតុអ្វីបានជាគេចាំបាច់ត្រូវការ Google Assistant ទៀតនោះ គឺដោយសារតែវាអាចបំពេញកិច្ចការ និងឆ្លើយតបសំណួរដែលមានលក្ខណ:ស្មុគស្មាញជាង Siri។ ម្យ៉ាងទៀត Google Assistant មានផ្ទាំងកម្មវិធីដែលអនុញ្ញាតឱ្យអ្នកប្រើប្រាស់ងាយស្រួលធ្វើការសន្ទនាជាមួយវា និងអាចចូលប្រើបានយ៉ាងឆាប់រហ័សថែមទៀតផង។

នេះគឺជាការងារមួយចំនួនដែល Google Assistant អាចធ្វើបាននៅលើ iPhone:
– ហៅទូរសព្ទចេញរហ័ស
– វាយ ឬសួរសំណួរផ្សេងៗ
– ប្រើកម្មវិធី Google Maps ជំនួស Apple Maps
– ផ្ញើ Email, SMS, និង iMessage
– កំណត់ការក្រើនរំឭក និងកិច្ចការផ្សេងៗលើ Calendar
– ចាក់ចម្រៀងស្តាប់
– អាចសួររកអ្វីគ្រប់យ៉ាងនៅលើ Google
– សួរយោបល់ពីវា ដូចជាទាក់ទងទៅនឹងអកាសធាតុ។ ឧ: “Will I need umbrella today?”

នេះគឺជាការងារមួយចំនួនដែល Google Assistant មិនអាចធ្វើបាននៅលើ iPhone:
– មិនអាចបើកវាប្រើតាមប៊ូតុង Home
– មិនស្គាល់ពាក្យបញ្ជា ‘OK, Google’
– មិនអាចកំណត់ម៉ោងរោទិ៍