ក្រុមហ៊ុន Huawei ទើបផ្ញើលិខិតអញ្ជើញទៅដល់ភាគីពាក់ព័ន្ធ ចូលរួមក្នុងសន្និសិទ្ធសារព័ត៌មានរបស់ខ្លួននៅឯសមាជបច្ចេកវិជ្ជា​ចល័តពិភពលោក ឬហៅកាត់ថា MWC ទីក្រុង Barcelona ប្រទេសអេស្ប៉ាញ ថ្ងៃអាទិត្យ ទី២៦ កុម្ភ: ឆ្នាំ ២០១៧ ម៉ោងក្នុងតំបន់។ នេះបើយោងតាមលិខិតអញ្ជើញពីនាយកប្រតិបត្តិរបស់ក្រុមហ៊ុន ដែលភ្ជាប់ទៅជាមួយសារ «យើងនឹងចែករំលែកនូវភាពទំនើបគួរឱ្យភ្ញាក់ផ្អើល និងគំនិតច្នៃបង្កើតថ្មីចុងក្រោយរបស់ Huawei»។

ទោះជាក្រុមហ៊ុនមិនបានប្រកាសថាខ្លួននឹងបើកបង្ហាញអ្វីនៅក្នុងលិខិតអញ្ជើញនោះក៏ដោយ ក៏បណ្តាអ្នកវិភាគនានាដែលតែងតាមដានឧបករណ៍ជំនាន់បន្ទាប់របស់ក្រុមហ៊ុនមួយនេះរំពឹងទុកមុនថា កំពូលទូរស័ព្ទ Huawei ត្រកូល P ជំនាន់ថ្មី ស៊េរី P10 នឹងត្រូវបានបើកបង្ហាញ ហើយប្រហែលចេញមករួមគ្នាជាមួយ P10 Plus ផងដែរ។

កន្លងមក ព័ត៌មានបែកធ្លាយជាច្រើនទាក់ទងទៅនឹងលក្ខណ:សម្បត្តិរបស់ Huawei P10 នេះ ដោយថា វានឹងបំពាក់អេក្រង់កោងនៅគែមចំហៀងប្រភេទ IPS ខ្នាត Quad HD ប្រើបន្ទះឈីប Kirin 960, RAM ទំហំ 6GB និងកាមេរ៉ាភ្លោះអមដោយបច្ចេកវិជ្ជាកាមេរ៉ាអាជីព Leica។

ព័ត៌មានចចាមអារ៉ាមទាំងនោះ គឺនៅមិនទាន់ច្បាស់ពីសមត្ថភាពពិតប្រាកដរបស់កាមេរ៉ា P10 នៅឡើយទេ ប៉ុន្តែ ព័ត៌មានខ្លះថា វានឹងបំពាក់អង្គញាណកាមេរ៉ាទំហំ ១២ មេហ្គាភិចសែលពីរគ្រាប់ដូច P9 ហើយខ្លះថា វានឹងបំពាក់អង្គញាណកាមេរ៉ាក្រោយពីរ ទំហំ ២០ និង ១២ មេហ្គាភិចសែល អមដោយបច្ចេកវិជ្ជាកាមេរ៉ា Leica ជំនាន់ទីពីររបស់ Mate 9 ឬក៏ប្រើប្រាស់បច្ចេកវិជ្ជា Leica ជំនាន់ទីបី។

កន្លងមក របាយការណ៍ជាច្រើនថា Huawei P10 នឹងប្រកាសចេញនៅខែមិនា ឬមេសា ដែលនេះយើងអាចទាញការសន្និដ្ឋានបានថា ក្រុមហ៊ុននឹងបើកបង្ហាញ P10 នៅថ្ងៃទី ២៦ កុម្ភ:នេះ នៅទីក្រុង Barcelona យ៉ាងពិតប្រាកដ។ ដូច្នេះ បើចង់ដឹងថាព្រឹត្តិការណ៍នោះ ក្រុមហ៊ុននឹងបើកបង្ហាញសមិទ្ធផលថ្មីៗអ្វីខ្លះ សូមប្រិយមិត្តកុំភ្លេចតាមដានជាមួយយើងខ្ញុំនៅថ្ងៃនោះទាំងអស់គ្នា៕

ប្រភពព័ត៌មាន៖ gsmarena