បញ្ហាចម្បងនៃកម្មវិធី Facebook គឺស្ថិតលើអ្នកប្រើប្រាស់គ្រប់គ្នា ព្រោះពួកគេទទូចបន្តការធ្វើអ្វី ឬនិយាយអ្វីដែលជារឿងផ្ទាល់ខ្លួន ដែលអាចបង្កការធុញទ្រាន់ដល់អ្នកដទៃ។

ប្រសិនបើអ្នកប្រើប្រាស់គ្រប់រូប យល់ពីរបៀបលេងកម្មវិធី Facebook បានត្រឹមត្រូវតាមការណែនាំ ប្រហែលជាលោកអ្នកអាចនឹងរីករាយក្នុងការឆែកមើល News Feed ជាមួយនូវអ្វីៗដែលមានប្រយោជន៍ និងមានន័យ យ៉ាងរីករាយ។

ប៉ុន្តែមកទល់ពេលនេះ អ្នកប្រើប្រាស់កម្មវិធីបណ្តាញសង្គម Faceboook ប្រហែលមិនទាន់ជ្រាបច្បាស់នូវអ្វីគួរប្រព្រឹត្តិ និងអ្វីមិនគួរនោះឡើយ។ ដូច្នេះហើយ បានជាក្រុមការងារ Post Tech លើកយក ១០ ចំណុចដែលប្រិយមិត្តមិនគួរប្រពឹត្តិដូចខាងក្រោម៖

ចំណុចទី ១ – ចែកចាយបន្តរាល់អ្វីដែលបានឃើញ (Share)

យើងពុំគួរ Share គ្រប់រឿងរ៉ាវដែលបានប្រទះឃើញលើ News Feed នោះទេ មិនថាតិចក្តី ឬច្រើនក្តី ត្រូវប្រាកដថា វាជាប្រយោជន៍ដល់អ្នកដទៃ ឬត្រឹមតែខ្លួនឯង។ បើលោកអ្នកនៅតែបន្ត Share មិនគិតលទ្ធផលចុងក្រោយ នោះមិត្តរបស់អ្នកលើ​ Facebook នឹងកើតការធុញទ្រាំចំពោះអ្នកជាមិនខាន។

ចំណុចទី ២ – បង្ហោះព័ត៌មានផ្ទាល់ខ្លួន

អ្នកលេង Facebook មួយចំនួន តែងចូលចិត្តបង្ហោះរឿងរ៉ាវផ្ទាល់ខ្លួន តួយ៉ាងដូចជា “ខ្ញុំស្អប់(អ្វីមួយ)” ឬ “ខ្ញុំនឹងឈប់ញុំាស្រាទៀតហើយ”។ ជាការពិតណាស់ ពាក្យពេចន៍ទាំងនេះសុទ្ធសឹងតែមិនមែនជារឿងដែលពាក់ព័ន្ធនឹងអ្នកដទៃ ហើយនេះគឺជាតំណមដែលអ្នកឈ្លាសវៃពុំគួរលើកមកបង្ហាញឲ្យគេឃើញនោះទេ។

ចំណុចទី ៣ – ការបង្ហោះអ្វីដដែលៗ

ឧទាហរណ៍ថា ប្រិយមិត្តធ្វើដំណើរកម្សាន្ត និងបានផ្តិតយករូបថតជាច្រើនសន្លឹក រួចយកមកបង្ហោះលើបណ្តាញសង្គម ដែលរូបថតទាំងអស់សុទ្ធសឹងជារូបប្លង់តែមួយ ឬអាចជារូបភាពបង្កភាពច្រណែនដល់មិត្តអ្នកមើល។ ធ្វើបែបនេះជាញយដង អ្នកដទៃអាចនឹង Unfriend ប្រិយមិត្តដោយមិនដឹងខ្លួន រហូតដល់លោកអ្នកចូលឆែកមើលគណនីរបស់គេទើបដឹងថាមិនទាន់ជា Friend នឹងគ្នា។

ចំណុចទី ៤ – ប្តូរឈ្មោះប្លែកៗ

រាល់ពេលដែលអ្នកប្តូរឈ្មោះ Facebook ម្តងៗគឺថា កម្មវិធីនឹងមិនបានបង្ហាញប្រាប់ទៅដល់មិត្តអ្នកលេងផ្សេងៗទេ អីចឹងអ្នកអាចបាត់បង់ទំនាក់ទំនង ប្រសិនបើគេស្វែងរកឈ្មោះអ្នកលែងឃើញ ដរាបណាអ្នកបង្ហោះសារអ្វីផ្សេងដល់ពួកគេឲ្យបានដឹង។

ចំណុចទី ៥ – បង្ហាញពីសមិទ្ធផលអ្វីមួយ

ក្រោយពេលដែលអ្នកជោគជ័យលើកិច្ចការអ្វីមួយ ឬបង្កើតបានស្នាដៃអ្វីថ្មី ក៏ចង់បង្ហោះលើបណ្តាញសង្គម ដើម្បីបង្ហាញភាពឆ្នើមរបស់អ្នកដោយគិតខ្លួនឯងថា កិច្ចការដែលខ្លួនបានធ្វើរួច វាពិតជាអស្ចារ្យសម្រាប់បង្ហោះឲ្យមិត្តដទៃឃើញ។ ចុះបើសិនវាជារឿងដែលមិនគួរឲ្យចាប់អារម្មណ៍ដូចអ្នកគិតវិញនោះ ដូច្នេះអ្នកគួរតែផ្ញើលទ្ធផលដែលបានសម្រេចរួច ទៅកាន់បងប្អូន ឬម៉ាក់ប៉ាសាកលមើលជាមុនសិន។

ចំណុចទី ៦ – យកបណ្តាញសង្គមធ្វើជាកន្លែងសួររកចម្លើយ

តំណមក្នុងការប្រើប្រាស់ Facebook សូមកុំយកសំណួរខ្លួនឯងទៅចោទសួរនៅលើកម្មវិធីនេះ ព្រោះថាគ្មានអ្នកណាដែលចង់យកបណ្តាញសង្គមសម្រាប់កម្សាន្តលេងសប្បាយ មកធ្វើជាកន្លែងឆ្លើយសំណួរបង្កភាពអាប់អួរនោះទេ ដោយឡែកប្រិយមិត្ត អាចសួរនៅលើ Google​ បាន ជាមួយចម្លើយដ៏សម្បូរបែប។

ចំណុចទី ៧ – យកការ Share ធ្វើជាការរក្សាទុកមើលពេលក្រោយសម្រាប់ខ្លួនឯង

ពីមុន អ្នកប្រើប្រាស់កម្មវិធី Facebook យល់ច្រឡំថា ដើម្បីងាយស្រួលស្វែងរកព័ត៌មានដែលបានប្រទះឃើញលើ News Feed របស់គេ ត្រូវតែ Share ដើម្បីឲ្យជាប់នៅលើ Profile ផ្ទាល់ខ្លួន តែនេះជាការភាន់ច្រឡំដ៏ធំមួយ ដោយសារ Facebook បានបញ្ចូលមុខងាររក្សាទុក (Save) រាល់គ្រប់ព័ត៌មានបានហើយ ដូច្នេះគួរបញ្ឈប់ការ Share ក្នុងគោលបំណងចង់មើលពេលក្រោយ។

ចំណុចទី ៨ – ស្នើសុំភ្ជាប់ទំនាក់ទំនងក្នុងឋានៈជាអ្វីមួយ

យុវជន-យុវតីសម័យនេះ តែងតែមានស្នេហាមុនពេលរៀបការ ដែលបណ្តាលឲ្យខាងបុរស ឬខាងនារីស្នើទាមទារសុំភ្ជាប់ទំនាក់ទំនងគ្នាក្នុងឋានៈជាសង្សារ (Relationship) ឬប្តីប្រពន្ធ (Married) លើកម្មវិធី​ Facebook ដោយផ្ទាល់។ ធ្វើដូចនេះ កម្មវិធីនឹងកត់ត្រាទុករាល់កាលបរិច្ឆទ Relationship ឬ Married ជាប់ជាមិនខាន។ សូមប្រាកដថា បើមិនទាន់ជាគូអនាគត ឬប្តីប្រពន្ធច្បាស់ទេ សូមកុំអាលសុំភ្ជាប់ទំនងទំនងគ្នាលើកម្មវិធី Facebook អី។

ចំណុចទី ៩ – Tag មិត្តដទៃចូលរូបថតបង្ហោះ ទាំងដែលពួកគេមិនមែននៅក្នុងរូបថតផង

មូលហេតុដែលប្រិយមិត្តពុំគួរ Tag មិត្តដទៃចូលរូបថតដែលទាំងគ្មានវត្តមានរបស់ពួកគេផង គឺដោយសារតែ ក្រោយពេលប្រិយមិត្ត​ Tag រូបថតឲ្យពួកគេ សូម្បីតែមិត្តរបស់ពួកគេក៏អាចមើលរូបថតនោះឃើញដូចគ្នា ប៉ុន្តែអ្វីដែលជាបញ្ហានោះគឺ ក្នុងរូបថតពុំមានរូបរបស់ពួកគេទេ។ បើសិនជាប្រិយមិត្ត Tag រូបឲ្យមិត្តដទៃកាន់តែច្រើន រូបថតនឹងបង្ហាញឲ្យអ្នកដទៃមើលឃើញកាន់តែច្រើន។

ចំណុចទី ១០ – ស្នើសុំជីវិតបន្តនៃការលេងហ្គេម Candy Crash ឬ 8 Ball Pool

មិត្តរបស់អ្នកលើកម្មវិធី Facebook​ មិនប្រាកដថា គេកំពុងលេងហ្គេមដែលអ្នកបានផ្ញើសុំជិវិតទៅនោះទេ ហើយការផ្ញើនេះ គឺតែងតែកើតឡើងរាល់ពេលដែលអ្នកត្រូវការជិវិតបន្តដើម្បីអាចលេងហ្គេម (Candy Crash ឬ 8 Ball Pool ) បានទៀត៕