Galaxy S8 និង​ S8+ គឺជាកំពូលស្មាតហ្វូនរបស់ក្រុមហ៊ុន Samsung ដែលទើបប្រកាសចេញកាលពីសប្តាហ៍មុន។ វាបានពាំនាំមកជាមួយលក្ខណៈសម្បត្តិ និងបច្ចេកវិទ្យាទំនើបៗឈានមុខគេជាច្រើន ដែលសូម្បីតែទូរសព្ទ iPhone ជំនាន់ចុងក្រោយគេ នាពេលបច្ចុប្បន្ន ពោលគឺ iPhone 7/ 7 Plus ក៏មិនអាចប្រៀបប្រដូចបាននោះដែរ។ ក្នុងនោះមានដូចជា៖

១– បច្ចេកវិទ្យាស្កេនប្រស្រីភ្នែក

បច្ចេកវិទ្យាស្គេនប្រស្រីភ្នែក ឬ Iris scanner របស់ S8 និង S8+ អាចប្រើសម្រាប់ដោះសោចូលទៅកាន់ការប្រើប្រាស់ទូរសព្ទ និងកញ្ចប់ឯកសារសុវត្ថិភាពផ្សេងៗបាន។ ក្រុមហ៊ុន Samsung អះអាងថា វាផ្តល់នូវសន្តិសុខសុវត្ថិភាពរឹងមាំជាងបន្ទះស្គេនក្រយៅដៃ ដែល iPhone កំពុងប្រើប្រាស់សព្វថ្ងៃ។

២– មុខងារថតសម្គាល់ផ្ទៃមុខសម្រាប់ដោះសោ

Galaxy S8 និង​ S8+ អនុញ្ញាតឱ្យអ្នកប្រើប្រាស់ប្រើកាមេរ៉ាមុខ ដែលទុកសម្រាប់ថតរូប Selfie ថតសម្គាល់ផ្ទៃមុខដើម្បីដោះសោទូរសព្ទបាន ហើយវាមានល្បឿនលឿនជាង iris scanner និង fingerprint ថែមទៀតផង។

៣– អេក្រង់ធំ លាតសន្ធឹងស្ទើរគ្មានស៊ុម

ផ្ទៃអេក្រង់របស់ Galaxy S8 និង S8+ ត្រូវបានពង្រីកឱ្យលាតសន្ធឹងរហូតស្មើនឹង ៩៣% នៃផ្ទៃទូរសព្ទ។ តាមរយៈរចនាបទនេះ Samsung អាចបង្កើនទំហំអេក្រង់របស់វារហូតដល់ ៥.៨ អីុញ និង ៦.២ អីុញ តែរក្សាទំហំទូរសព្ទនៅដដែល ខណៈដែល iPhone 7 និង 7 Plus មានអេក្រង់ទំហំត្រឹមតែ ៤.៧ អីុញ និង ៥.៥ អីុញ។

៤– អាចសាកថ្មដោយមិនចាំបាច់ដោតខ្សែចូលតួទូរសព្ទ

Samsung រចនាឆ្នាំងសាកថ្មឥតខ្សែជំនាន់ថ្មី មានរាងជាបន្ទះមូលមានជើងទម្រយ៉ាងស្រស់ស្អាតសម្រាប់ Galaxy S8 និង​ S8+ បន្ថែមពីលើបច្ចេកវិទ្យា​សាកថ្មរហ័ស អាចបំពេញថាមពលថ្មលឿនជាងឆ្នាំងសាកធម្មតា ខណៈទូរសព្ទ iPhone ពុំទាន់មាននៅឡើយ។

៥– អាចប្រើឌុយដោតកាសធម្មតាបាន

អ្នកប្រើប្រាស់អាចប្រើឌុយកាសធម្មតា ប្រភេទ 3.5mm សម្រាប់ដោតភ្ជាប់ជា​​មួយ​​ខ្សែកាស និងឧបករណ៍ផ្សេងៗជាច្រើនផ្សេងទៀត បន្ថែមពីលើជម្រើសតភ្ជាប់ឥតខ្សែបានជាមួយទូរសព្ទ Samsung ស៊េរីចុងក្រោយនេះ។ ប៉ុន្តែ សម្រាប់ iPhone 7/ 7 Plus វិញ គឺអាចប្រើបានត្រឹមតែជាមួយកាសឥតខ្សែប៉ុណ្ណោះ។

៦– Samsung Pay អាចប្រើទូទាត់វិក្កយបត្រតាមម៉ាស៊ីនឆូតកាតធម្មតាបាន

ជាមួយការប្រើប្រាស់សេវាកម្មទូទាត់​ការចាយវាយតាម Samsung Pay អ្នកមិនចាំបាច់ត្រូវការបន្ទះ NFC ពិសេសណាមួយ ដូចជាសេវាកម្ម Apple Pay ឡើយ។ ពោលគឺ វាអាចប្រើជាមួយម៉ាស៊ីនឆូតកាត់ធម្មតាបានតែម្តង។

៧– ភ្ជាប់មកជាមួយកម្មវិធីដែលអាចដំណើរការជាមួយវ៉ែនតា VR រួចជាស្រេច

លោកអ្នកនឹងទទួលបានការបន្ថែមជូនវ៉ែនតា Gear VR មួយ ប្រសិនបើកម្ម៉ង់ទិញ Galaxy S8 ឬ S8+ មុនថ្ងៃទី ២១​ មេសា ហើយអាចប្រើជាមួយវ៉ែនតានោះ ដោយមិនចាំបាច់ត្រូវការទាញយកកម្មវិធីបន្ថែមអ្វីនោះឡើយ ពោលគឺ វាមានភ្ជាប់កម្មវិធី VR ស្រាប់តែម្តង។ ដោយឡែក សម្រាប់ iPhone វិញ គឺវាអាចប្រើប្រាស់បានតែជាមួយវ៉ែនតា VR មួយចំនួន ដូចជា Google Cardboard តែប៉ុណ្ណោះ។

៨– បំពាក់អង្គញាណវាស់ចង្វាក់បេះដូងនៅខាងក្រោយ

ប្រសិនបើលោកអ្នកមាន Galaxy S8 ឬ S8+ ក្នុងដៃ ហើយចង់វាស់ចង្វាក់បេះដូង មិនចាំបាច់ត្រូវការទិញនាឡិកាវៃឆ្លាតជំនួយបន្ថែមដូចជា iPhone នោះទេ ពោល គឺវាត្រូវបានភ្ជាប់មករួចជាស្រេចនូវបន្ទះស្គេនចង្វាក់បេះដូងនៅខាងក្រោយខ្នងរួចជាស្រេចហើយ។

៩– អាចប្រើស្រដៀងទៅនឹងកុំព្យូទ័រលើតុបាន

ជាមួយ Galaxy S8 និង S8+ លោកអ្នកអាចប្រើភ្ជាប់ជាមួយអេក្រង់កុំព្យូទ័រ ក្តារចុច និងកូនកណ្តុរបានយ៉ាងងាយស្រួល តាមរយៈឌុយពិសេសមួយ សម្រាប់ដំណើរការប្រព័ន្ធកម្មវិធីរបស់ស្មាតហ្វូន ឱ្យដូចជាប្រព័ន្ធកុំព្យទ័រលើតុធម្មតា។

១០– បំពាក់ជំនួយការ Bixby អាចថតសម្គាល់វត្ថុក្នុងរូបភាពបាន

ជំនួយការសំឡេងឌីជីថល Bixby របស់ Samsung មិនត្រឹមតែចេះផ្តល់យោបល់ ក្រើនរំឭក និងអានអ្វីៗជូនលោកអ្នកនោះទេ ប៉ុន្តែ វាថែមទាំងចេះថតសម្គាល់វត្ថុក្នុងរូបភាពផ្សេងៗ ហើយស្វែងរកព័ត៌មានពាក់ព័ន្ធនឹងវត្ថុទាំងនោះ ដូចជាទីកន្លែងដែលវាត្រូវបានដាក់លក់ជាដើម។ល។ សម្រាប់លោកផងដែរ។

យ៉ាងណាក៏ដោយ ក្រុមហ៊ុន Apple មិនទាន់បានបញ្ចេញ​ iPhone ជំនាន់ថ្មី ដែលគេជឿថា នឹងជា iPhone 8 និង 8 Plus នៅឡើយទេ។ ថាមិនត្រូវ វាមានភ្ជាប់មកជាមួយលក្ខណៈសម្បត្តិ និងបច្ចេកវិទ្យាថ្មីៗ ដែលអាចកាច់បំបាក់កំពូលទូរសព្ទ Galaxy S ស៊េរីឆ្នាំ ២០១៧ របស់ក្រុមហ៊ុន Samsung ទាំងពីរម៉ូឌេលនេះ ក៏ថាបាន៕