ប្រិយមិត្តទាំងអស់គ្នាប្រហែលជា កំពុងតែរីករាយ នៅពេលឃើញបុត្រធីតារបស់ខ្លួនដែលមានអាយុក្រោម ១០ ឆ្នាំ បាននឹងកំពុងលេងយ៉ាងសប្បាយជាមួយបច្ចេកវិជ្ជាស្មាតហ្វូនហើយមើលទៅ បើអីចឹងមែននោះ លោកអ្នកពិតជាគិតខុសហើយ។

លោក Bill Gates ដែលជាស្ថាបនិកក្រុមហ៊ុន​ Microsoft និងប្រពន្ធឈ្មោះ Melinda បានហាមប្រាមបុត្រធីតារបស់ពួកគេ មិនឲ្យប៉ះពាល់នូវស្មាតហ្វូន រហូតដល់វ័យ ១៤ ឆ្នាំ។​ ទោះជាយ៉ាងណា កូនៗទាំងនោះ បានជំទាស់មកវិញថា មិត្តភក្តិរបស់ពួកគេជាច្រើន មានសិទ្ធអាចប្រើប្រាស់ស្មាតហ្វូនបានដោយសេរី។

បើយោងតាមការស្រាវជ្រាវក្នុងឆ្នាំ ២០១៦ ដោយស្ថាប័ន Influence Central បង្ហាញមកថា ក្មេងៗដែលមានវ័យចាប់ពី ១០ ឆ្នាំ ទៅ ទើបបានអាចប្រើប្រាស់នូវស្មាតហ្វូនបាន។ ដូច្នេះ ផែនការរបស់លោក Gates ដែលហាមកូនៗមិនឲ្យប្រើស្មាតហ្វូនរហូតដល់អាយុ ១៤ ឆ្នាំនោះ ប្រហែលនឹងអាចធ្វើឲ្យពួកគេ ស្វែងយល់ពីបច្ចេកវិទ្យាបានយឺតជាងក្មេងដទៃ។

លោក Gates បានដាក់គោលការណ៍ប្រើប្រាស់ស្មាតហ្វូនយ៉ាងតឹងរឹង ទៅលើកូនៗណាដែលមានស្មាតហ្វូនប្រើ ហើយជាពិសេស គឺហាមមិនអោយមានស្មាតហ្វូននៅលើតុញុំាអាហារពេលល្ងាចឡើយ។

លោកបានប្រាប់ទៅកាន់សារព័ត៌មាន The Mirror ថា ក្មេងៗទាំងនោះ នឹងត្រូវបានកំណត់ម៉ោងប្រើប្រាស់ ដើម្បីជួយឲ្យពួកគេចូលដំណេកបានទៀងទាត់ពេលវេលា។

គួរឲ្យភ្ញាក់ផ្អើលដែលថា លោក Gates មិនមែនជាមនុស្សតែម្នាក់ ដែលមានឈ្មោះល្បីល្បាញ ហើយបានកំណត់នូវការប្រើប្រាស់បច្ចេកវិជ្ជាចំពោះកូននោះឡើយ។ គួររំលឹកថា កាលពីឆ្នាំ ២០១៤ ស្ថាបនិកក្រុមហ៊ុន Apple លោក Steve Jobs បានប្រាប់ទៅកាន់សារព័ត៌មាន New York Times ថា នៅពេលនោះ កូនរបស់លោកមិនទាន់អនុញ្ញាតឲ្យប្រើ iPad បានទេ និងបន្ថែមថា គាត់ក៏បានកំណត់នូវការប្រើប្រាស់បច្ចេកវិជ្ជាសម្រាប់កូនៗនៅក្នុងគេហដ្ឋានរបស់ខ្លួនផងដែរ៕

ប្រភពព័ត៌មាន៖ Mashable