iPhone ត្រូវបានគេសរសើរមិនដាច់ពីមាត់ទៅលើគុណភាពកាមេរ៉ាថា វាពិតជាអាចថតផ្តិតយករូបភាពបានយ៉ាងច្បាស់ល្អតាមបែបធម្មជាតិ មិនចាញ់កាមេរ៉ាអាជីពប៉ុន្មានទេ។ មិនតែប៉ុណ្ណោះ យើងឃើញមានមុខងារពិសេសៗ និងមានប្រយោជន៍ជាច្រើននៅលើកម្មវិធីថតរូប Camera ដែលមានស្រាប់នៅក្នុង iPhone ដែលពេញនិយមមួយនេះ។ មុខងារទាំងនោះហើយ ដែលត្រូវប្រើប្រាស់ដើម្បីថតរូបឲ្យបានកាន់តែច្បាស់ និងមានភាពទាក់ទាញ។ ហេតុដូចនេះប្រិយមិត្តគួរយល់ដឹងអំពីការប្រើប្រាស់វា ឲ្យបានគ្រប់ជ្រង់ជ្រោយ តាមការបង្ហាញជូនខាងក្រោម៖

១​ – ការថតផ្ចង់លើវត្ថុណាមួយ (Focus)

នៅពេលដែលអ្នកកំពុងថតរូប ត្រូវប្រាកដក្នុងចិត្តថា នឹងផ្តោតលើវត្ថុណាមួយជាគោល។ នៅលើកម្មវិធី Camera ត្រូវចុចប៉ះចំកន្លែងផ្តោតសំខាន់ជាងគេ ដើម្បីឲ្យកាមេរ៉ាផ្ចង់ចំគោលដៅ។ នៅលើផ្ទាំងថតរូបដដែល អ្នកអាចចុចលើអេក្រង់ឲ្យជាប់ រួចទាញឡើងលើ ដើម្បីបន្ថែមពន្លឺ ឬទាញចុះក្រោមដើម្បីបន្ថយពន្លឺ។ ចំណុចពិសេសជាងគេ គឺការថត Lock Focus មានន័យថា បញ្ជាឲ្យកម្មវិធីចាប់យកវត្ថុណាមួយឲ្យជាប់ មិនងាកទៅចំណុចផ្សេង។ ដោយគ្រាន់តែ ចុចឲ្យជាប់ត្រង់ចំណុចចង់បាននៃរូបថត រហូតដល់កម្មវិធីលោតចេញពាក្យថា AE/AF Lock រួចចាំលែងដៃ។ ធ្វើបែបនេះ ដើម្បីធានាថា ការថតរូបត្រូវតាមអ្វីដែលចង់បាន កុំឲ្យកម្មវិធីផ្ចង់ខុសចំណុច ក្នុងករណីដៃយើងមិនសូវមានលំនឹង។

២ – ប្រើកាសបញ្ជាថត

កាសស្តាប់ត្រចៀកដែលភ្ជាប់មកស្រាប់ជាមួយ iPhone បានបង្កប់នូវមុខងារពិសេសម្យ៉ាងដែលប្រិយមិត្តខ្លះមិនដែលដឹង។ នៅពេលដែលដោតកាសភ្ជាប់ជាមួយ iPhone ខណៈកំពុងបើកកម្មវិធី Camera លោកអ្នកអាចចុចលើប៊ូតុងបន្ថែម ឬបន្ថយសម្លេងក៏បាន ដើម្បីធ្វើការបញ្ជាថតរូបនៅលើទូរស័ព្ទ ដោយផ្តល់ភាពងាយស្រួលក្នុងការថតរូប Selfie មិនឲ្យមានសភាពព្រាល ឬមិនច្បាស់។

៣ – ប្រើមុខងារ Grid

នេះគឺជាវិធីចាស់មួយប៉ុន្តែអាចប្រើការបាន ហៅថាមុខងារ Grid ដោយបង្ហាញចេញជាក្រលាចក្រត្រង់នៅលើផ្ទាំងថតរូប ផ្តល់ភាពងាយស្រួលដល់ការថតចាប់យកវត្ថុណាមួយ ឲ្យចំផ្ទៃកណ្តាលនៃសន្លឹករូបថត។ ដើម្បីបើកមុខងារនេះ សូមចូលទៅកាន់កម្មវិធី Setting បន្ទាប់មកចូល Photos & Camera បន្ទាប់មកទៀត ទាញបើកមុខងារ Grid ជាការស្រេច។ ក្រោយមក សូមត្រឡប់ទៅកាន់កម្មវិធី Camera អ្នកនឹងឃើញក្រលាចក្រត្រង់នៅលើផ្ទៃរូបថត។

៤ – ថតបែប HDR

បើកមុខងារ HDR ដោយគ្រាន់តែចុចលើពាក្យ HDR ក្នុងកម្មវិធី Camera បន្ទាប់មករើសយកពាក្យថា On ឬចុចពាក្យថា Auto ដើម្បីឲ្យកម្មវិធីបើកវាដោយស្វ័យប្រវត្តិ ខណៈពេលសាកសម។ HDR ជួយឲ្យការថតរូបនៅពេលដែលមានពន្លឺជះខ្លាំង កែប្រែទៅជាពន្លឺរាងងងឹតវិញបែបធម្មជាតិ ឬធ្វើឲ្យរូបថតមានពន្លឺដិតជាងធម្មតា។

៥ – ថតជាប់គ្នារដឹក (Burst)

ការថត Burst វាមានសារៈសំខាន់ណាស់នៅពេលដែលចាប់យករូបចេញពីសកម្មភាពណាមួយ ដោយវាអាចថតផ្តិតយករូបភាពជាច្រើនសន្លឹក ប្រើប្រាស់ថេរវេលាដ៏ខ្លី។ វិធីអនុវត្ត ប្រិយមិត្តគ្រាន់តែចុចឲ្យជាប់លើប៊ូតុងថត ភ្លាមនោះកម្មវិធីនឹងចាប់ផ្តើមថតរូបជាច្រើនសន្លឹកជាប់គ្នារដឹកក្នុងអាល់ប៊ុមតែមួយ រហូតទាល់តែអ្នកលែងដៃចេញ។ ជាលទ្ធផល ក្រោយមក អ្នកនឹងអាចជ្រើសរើសយករូបណា ក្នុងចំណោមរូបជាច្រើនសន្លឹក ដែលបានថតចេញពីសកម្មភាពមួយនោះ។ វិធីជ្រើសរើសរូបថត Burst សូមចុចលើរូបថតមួយនោះ រួចជ្រើសយកពាក្យថា Select បន្ទាប់មកអូសឆ្វេង ឬស្តាំដើម្បីជ្រើសរើសរូបណាមួយដែលពេញចិត្ត បន្ទាប់មកទៀតចុចពាក្យថា Done។

៦ – ថតព្រាលផ្ទៃខាងក្រោយ

មុខងារនេះមានតែនៅលើ iPhone 7 Plus ប៉ុណ្ណោះ វាហៅថា Portrait Mode ដែលអាចថតចាប់យកមុខមនុស្ស ឬវត្ថុណាមួយផ្តាច់ចេញពីផ្ទៃខាងក្រោយ នឹងធ្វើឲ្យព្រាលត្រង់កន្លែងមិនផ្តោតទៅលើ។ នៅក្នុងកម្មវិធី Camera លោកអ្នកគ្រាន់តែអូសឆ្វេង ឬស្តាំដើម្បីជ្រើសយកមុខងារ Portrait Mode រួចអាចចាប់ផ្តើមថតបានហើយ។

សំណាងល្អ ចំពោះអ្នកមិនមាន iPhone 7 Plus ប្រើ ក៏អាចថតរូបទទួលបានការព្រាលផ្ទៃខាងក្រោយបានដែរ។

សូមចុចចូលអត្ថបទ៖ កាន់ iPhone ស៊េរីចាស់ ចង់ថតរូបព្រាលផ្ទៃខាងក្រោយដូច iPhone 7 Plus មានទៅពិបាកអី!

៧ – យឹតរូបថត (Optical Zoom)

មុខងារនេះក៏មានតែនៅលើ iPhone 7 Plus ដូចគ្នា ប៉ុន្តែប្រិយមិត្តក៏គួរតែយល់ដឹងពីគុណសម្បត្តិរបស់វាផងដែរ។ នៅលើផ្ទាំងកម្មវិធី Camera អ្នកអាចចុចលើប៊ូតុង 1x បន្ទាប់មកចុចលើពាក្យ 2x ដើម្បីយឹតរូបថតឲ្យកាន់តែជិតទ្វេដង និងមិនបាត់បង់គុណភាពសូម្បីបន្តិច។ ហើយការថតបែបនេះវាមានសារៈសំខាន់ណាស់ នៅពេលដែលថតចាប់យករូបនៅឆ្ងាយពីខ្លួន។