រោងចក្រផលិត Like មួយនៅក្នុងប្រទេសចិនត្រូវបានគេបង្កើតឡើងដើម្បីចុច Like និង Follow នៅលើព័ត៌មានដែលបានបង្ហោះផ្សាយតាមបណ្តាញសង្គមដូចជា Facebook ដោយស្វ័យប្រវត្តិ ត្រូវបានគេទម្លាយឱ្យ ឃើញតាមរយ:វីដេអូឃ្លីបមួយ។

វីដេអូនោះ បានបង្ហាញពីការិយាល័យមួយ ដែលគេហៅថា ‘រោងចក្រផលិត Like’ មានបំពាក់ដោយជញ្ជាំងផ្គុំឡើងដោយស្មាតហ្វូនរាប់រយគ្រឿង កំពុងប្រតិបត្តិការចុចលើប៊ូតុង Like និង Follow លើគណនីខុសៗគ្នាជាបន្តបន្ទាប់ ដោយឥតឈប់ឈរ។ រោងចក្រនេះ ត្រូវបានបង្កើតឡើងដោយក្រុមហ៊ុនបច្ចេកវិទ្យា startup មួយរបស់ចិន ឋិតនៅក្នុងទីក្រុង Shenzhen ខេត្ត Guangdong ដើម្បីផ្តល់សេវាបង្កើនចំនួន Like, ទស្សនា, និង Comment ដល់គណនីបណ្តាញទំនាក់ទំនងសង្គមជាក់លាក់នានា។

លោក Artem Zhdanov ជាអ្នកដែលបានចែកចាយវីដេអូនេះ និងជានាយកទីផ្សារក្រុមហ៊ុន UChina បានឱ្យដឹងថា ទូរសព្ទទាំងនោះត្រូវបានតភ្ជាប់គ្នាពីមួយទៅមួយតាមរយ:ខ្សែ និងគ្រប់គ្រងដោយកុំព្យូទ័រចំនួនពីរគ្រឿង។ លោកបន្ថែមថា រោងចក្របែបនេះ គឺមានមួយកន្លែងផ្សេងទៀត និងធំជាងនេះ ហើយវាបំពាក់ដោយស្មាតហ្វូនរហូតដល់ទៅជាង ១ ម៉ឺនគ្រឿង។

គួរបញ្ជាក់ថា ចំនួន Like និង Follow ហាក់កំពុងដើរតួនាទីយ៉ាងសំខាន់ និងត្រូវបានគេផ្តល់តម្លៃយ៉ាងខ្លាំងនៅក្នុងសម័យបណ្តាញសង្គមនាពេលបច្ចុប្បន្ន។ ម្លោះហើយ បានជាមានក្រុម IT មួយចំនួន រិះរកគ្រប់វិធីដើម្បីបង្កើត Like និង Follow ឱ្យបានច្រើនតាមដែលអាចធ្វើទៅបាន ហើយវិធីទាំងនោះ ត្រូវបានគេចាត់ទុកថាជាការបង្កើត Like និង Follow ក្លែងក្លាយ ដែលក្រុមហ៊ុន Facebook ក៏បាននិងកំពុងដាក់ចេញនូវវិធានការផ្សេងៗដើម្បីទប់ស្កាត់សកម្មភាពទាំងនេះផងដែរ៕

ប្រភពព័ត៌មាន: rt