Galaxy Note គឺជាត្រកូលទូរសព្ទដៃទំនើបអេក្រង់ធំលំដាប់កំពូល និងដ៏មានប្រជាប្រិយភាពរបស់ក្រុមហ៊ុន Samsung។ ក្រោយពីជួបវិបត្តិផ្ទុះឆេះថ្មដ៏កក្រើករំជួយក្នុងឆ្នាំ ២០១៦ ជាមួយម៉ូឌែល Note 7 មក នៅពេលនេះ រៀមច្បងរបស់វាត្រូវបានរំលេចរូបរាងសារជាថ្មី ជាមួយរចនាបថថ្មី គឺថ្មីទាំងស្រុងតែម្តង ពោលគឺ ខុសដាច់ពីម៉ូឌែលឆ្នាំ ២០១៦។

បើតាមរូបរាង និងព័ត៌មានបែកធ្លាយបង្ហោះផ្សាយលើគេហទំព័រ SamMobile វានឹងមានអេក្រង់កាន់តែធំ បំពាក់កាមេរ៉ាភ្លោះនៅខាងក្រោយ និងបន្ទះស្គេនក្រយៅដៃនៅពីក្រោមស្រទាប់អេក្រង់ខាងមុខតែម្តង។

ប្រភពដដែលថា Note 8 ត្រូវគេជឿថា នឹងបំពាក់អេក្រង់ទំហំ ៦.៣ អីុញ គឺធំជាង​អេក្រង់របស់ Note 7 ទំហំ ០.៦ អីុញ ប៉ុន្តែ នៅរក្សាទំហំខ្លួននៅដដែល ដែលនេះ នឹងនាំឱ្យវាក្លាយជាស្មាតហ្វូនអេក្រង់ធំបំផុតមិនធ្លាប់មានរបស់ក្រុមហ៊ុន Samsung។

ដោយឡែកខ្នាតអេក្រង់របស់វាទៀតសោត គឺរៀងទ្រវែង 18.5:9 (បណ្តោយ ១៨.៥ អីុញ, ទទឹង ៩ អីុញ) ងាយស្រួលចាប់កាន់ក្នុងប្រអប់ដៃតែម្ខាង ហើយនេះ គឺដូចទៅនឹងខ្នាតអេក្រង់របស់ LG G6 និង iPhone 8 អីចឹងដែរ។

Galaxy Note 8 ត្រូវបានប្រភពដដែលអះអាងថា នឹងពាំនាំមកជាមួយលក្ខណ:​សម្បត្តិពិសេសពីរ មិនធ្លាប់មានពីមុនមក សម្រាប់ក្រុមហ៊ុនអេឡិចត្រូនិកយក្សរបស់ប្រទេសកូរ៉េមួយនេះ។

ទីមួយគឺ វានឹងបំពាក់កាមេរ៉ាភ្លោះនៅខាងក្រោយ ដែលលក្ខណ:នេះ ត្រូវបានដកចេញពីទូរសព្ទ Galaxy S8 និង S8 Plus ដោយ​សារបញ្ហាពេលវេលា និងទីពីរគឺ វានឹងបំពាក់បន្ទះស្កេនក្រយៅដៃនៅខាងក្រោមស្រទាប់កញ្ចក់អេក្រង់មុខលើប៊ូតុង Home តែម្តង។

គួរបញ្ជាក់ថា តាមធម្មតា ក្រុមហ៊ុន Samsung តែងប្រកាសចេញត្រកូល Note នៅអំឡុងខែសីហា គឺមុនការប្រកាស iPhone ស៊េរីថ្មីរបស់ក្រុមហ៊ុន Apple ដែលជាគូប្រណាំងប្រជែងរបស់ខ្លួនមួយខែ។

ទោះយ៉ាងណា ទាំងនេះគ្រាន់តែជាព័ត៌មានក្រៅផ្លូវការប៉ុណ្ណោះ។ ដូច្នេះ ការពិតឬយ៉ាងណានោះ ក្រុមការងារ Post Tech នឹងពាំនាំមកជូនប្រិយមិត្តឱ្យបានជ្រាបនៅពេលក្រោយៗទៀត៕

ប្រភពព័ត៌មាន: forbes