ក្រុមហ៊ុន Apple នឹងធ្វើឱ្យផលិតផលទូរសព្ទដៃ iPhone ក្លាយជាឧបករណ៍ដ៏ចាំ​បាច់​មួយសម្រាប់អតិថិជន ក្នុងការប្រើប្រាស់ដើម្បីគាំពារសុខភាពរបស់ពួក​គេ ដែលវាជាផ្នែកមួយនៃការទៅពិគ្រោះ ឬតាមដានសុខភាពនៅមន្ទីរពេទ្យ ឬគ្លីនិក​នាថ្ងៃពេលអនាគត។ នេះបើយោងតាមប្រភពក្រៅផ្លូវការ ដែលបានអះអាងបន្ថែមថា ក្រុមហ៊ុននឹងផ្តោតការយកចិត្តទុកដាក់កាន់តែខ្លាំងទៅលើកម្មវិធីការគាំពារសុខភាពអ្នកប្រើប្រាស់។

អង្គភាពគាំពារសុខភាពថ្មីថ្មោងមួយរបស់ Apple ត្រូវគេរាយការណ៍ថា មានក្រុមការ​ងារមួយក្រុម កំពុងស្វះស្វែងធ្វើឱ្យគ្រោងការនេះសម្រេចទៅដល់គោលដៅ ដោយការបង្កើតចេញនូវកម្មវិធីរក្សាកំណត់ហេតុ និងទិន្ន​ន័យពិនិត្យព្យាបាលរបស់អតិថិជនសម្រាប់ទូរសព្ទ iPhone ជាដើម។

គម្រោងនេះដែរ នឹងមានការបង្កើតជាប្រព័ន្ធមួយដែលអាចផ្តល់ឱ្យអ្នកប្រើប្រាស់គ្រប់រូបនូវ Profile ផ្ទាល់ខ្លួនមួយ សម្រាប់ងាយស្រួលក្នុងការចូលទៅកាន់ព័ត៌មានស្តីឆែកសុខភាព លទ្ធផលតេស្តសុខភាព និងវេជ្ជបញ្ជា។ល។ ហើយវាបីដូចជាគ្លីនិកសុខភាពប្រចាំកាយមនុស្សម្នាក់ៗដែលឋិតនៅក្នុងដៃអញ្ចឹង។

កម្មវិធីប្រភេទនេះ នឹងអាចជួយដោះស្រាយបញ្ហាចែកចាយទិន្នន័យរបស់មន្ទីរ ឬគ្លីនិកសុខភាពផ្សេងៗ ដោយធ្វើឱ្យវាកាន់តែងាយស្រួលក្នុងការដោះដូរព័ត៌មានទៅមករវាងអ្នកជំងឺ និងវេជ្ជបណ្ឌិត ឬមន្ទីរពេទ្យ តាមប្រព័ន្ធអនឡាញនៅលើឧបករណ៍ចល័ត។​

យោងតាមគេហទំព័រ CNBC ដែលបានស្រង់សម្តីអ្នកស្និទ្ធនឹងគម្រោង បានឱ្យដឹង​ថា ក្រុមការងារ Apple កំពុងបង្ហាញគ្រោងការនៃប្រព័ន្ធកម្មវិធីថ្មីនេះ ទៅ​ដល់​ក្រុម​អ្នកអភិវឌ្ឍកម្មវិធី មន្ទីរពេទ្យ ស្ថាប័ន និងភាគីពាក់ព័ន្ធផ្សេងៗ ដើម្បីស្នើសុំការផ្តល់កិច្ចសហការបង្កើតវាឱ្យលេចចេញជារូបរាងឡើង៕

អានបន្ថែមTim Cook ធ្វើតេស្តឧបករណ៍វាស់សារជាតិគ្លុយកូសក្នុងខ្លួនភ្ជាប់ជាមួយ Apple Watch

Apple Watch នាពេលអនាគតនឹងអាចវាស់កម្រិតគ្លុយកូសក្នុងខ្លួនមនុស្ស

ប្រភពព័ត៌មានៈ mashable