Post News Media ព័ត៌មានបច្ចេកវិទ្យា LG ជោគជ័យក្នុ...

LG ជោគជ័យក្នុងការផលិតអេក្រង់ឆ្លុះពត់បានទំហំ ៧៧ អ៊ីញ ដំបូងបង្អស់របស់ពិភពលោក

ទីបំផុតទៅ ក្រុមហ៊ុនផលិតអេក្រង់ LG Display របស់ LG បានសម្រេចដោយ​ជោគ​​ជ័យលើគ្រោងការផលិតអេក្រង់ឆ្លុះសាច់អាចបញ្ចាំងរូបភាពគុណភាពកម្រិត UHD និងអាចពត់បានទំហំ ៧៧ អ៊ីញ ធំបំផុត និងដំបូងគេក្នុងលោក ដែលគាំទ្រដោយរដ្ឋាភិបាលហើយ។ នេះបើយោងតាមការប្រកាសរបស់ក្រុមហ៊ុនផ្ទាល់។

គម្រោងនេះដែរ គឺមានការទ្រទ្រង់ពីក្រសួងពាណិជ្ជកម្ម ឧស្សាហកម្ម និងថាមពលរបស់រដ្ឋាភិបាលកូរ៉េ ហើយចំណាយពេលរហូតដល់ ៥៩ ខែ មុននឹងសម្រេច។ គោលដៅនៃគម្រោង គឺធ្វើឡើងដើម្បីប្រជែងជា​មួយ​ផលិតផលអេក្រង់ប្រភេទនេះរបស់ក្រុមហ៊ុនចិន និងតៃវ៉ាន់ ដែលជាគូប្រកួតប្រជែងដ៏សំខាន់របស់ខ្លួន ក្នុងឧស្សា​ហកម្មអេក្រង់ពាណិជ្ជ។

អេក្រង់ទំហំ ៧៧ អ៊ីញ នេះ មានភាពឆ្លុះ ៤០ ភាគរយ និងកំណោង ៨០R ឬអាច​ពត់វាទៅជារង្វង់គិតជារង្វាស់រ៉ាដ្យង់ ៨០ មីល្លីម៉ែត្រ។ ក្រុមហ៊ុនផលិតបរិក្ខារនានាដែលបានចូលរួម បានអភិវឌ្ឍឧបករណ៍ល្អបំផុតសម្រាប់បម្រើដល់ការផលិតចេញទ្រង់ទ្រាយធំនូវអេក្រង់ឆ្លុះសាច់អាចពត់បាននេះ។

គួរបញ្ចាក់ផងដែរថា ក្រុមហ៊ុន LG បានផលិតចេញអេក្រង់ប្រភេទនេះ ជាលើកដំបូងបង្អស់នៅក្នុងឆ្នាំ ២០១៤ ហើយកាលណោះ វាមានទំហំត្រឹមតែ ១៨ អ៊ីញប៉ុណ្ណោះ។ លុះដល់ឆ្នាំ ២០១៦ ក្រុមហ៊ុនបានបង្កើនទំហំរបស់វារហូតដល់ ៥៥ អ៊ីញ និងមានភាពឆ្លុះ ៤០ ភាគរយ។

ដោយឡែក Google ត្រូវគេរាយការណ៍ថា កំពុងដាក់ទុនវិនិយោគនៅក្នុងក្រុមហ៊ុន LG Display ដើម្បីទទួលបានការផ្គត់ផ្គង់អេក្រង់ OLED ខ្នាតតូចអាចពត់បានសម្រាប់បំពាក់លើទូរសព្ទ Pixel ជំនាន់បន្ទាប់របស់ខ្លួន៕

ប្រែសម្រួល: សេង, ប្រភពព័ត៌មាន: cnet