ព័ត៌មានបច្ចេកវិទ្យា

ទើបតែចេញសោះ តែ iPhone និង Samsung សុំខ្មាស់!

Essential Phone គឺជាស្មាតហ្វូនម៉ាកថ្មីចុងក្រោយបង្អស់របស់ពិភពលោក ដែលជាស្នាដៃបង្កើតឡើងដោយ ស្ថាបនិកប្រព័ន្ធ Android គឺលោក Andy Robin និងដែលទើបប្រកាសចេញជាផ្លូវការកាលពីថ្ងៃម្សិលមិញនេះ។

ជាមួយរចនាបថដ៏ប្រណិត និងលក្ខណ:សម្បត្តិកម្រិតខ្ពស់ គេពុំចាំបាច់សង្ស័យឡើយថា វាត្រូវបានផលិតឡើងសម្រាប់ប្រជែងជាមួយកំពូលស្មាតហ្វូនស៊េរីឆ្នាំ ២០១៧ ដែលកំពុងមានវត្តមាននៅលើទីផ្សារនោះ ជាពិសេស កំពូលស្មាតហ្វូនពីក្រុមហ៊ុន Apple និង Samsung តែម្តង។

តួខ្លួនត្រូវបានផលិតឡើងដោយលោហ:ទីតានីញ៉ូមដ៏ប្រណិត ភ្លឺរលើបរលោង និងរឹងមាំ បំពាក់អេក្រង់ស្ទើរគ្មានបន្សល់គែមព័ទ្ធជុំវិញទំហំ ៥.៧ អីុញ ជាមួយខ្នាតបញ្ចាំងរូបភាព ១៣១២x២៥៦០ ភិចសែល និងផ្តល់ថាមពលដោយបន្ទះឈីប Snapdragon 850 ជំនាន់ចុងក្រោយរបស់ក្រុមហ៊ុន Quadcomm ហើយភ្ជាប់មកជាមួយប្រព័ន្ធ Android 7.0 ពីក្នុងប្រអប់តែម្តង។

នៅក្នុងសន្និសីទ Code Conference មិ្សលមិញ លោក Andy បានថ្លែងថា «Essential Phone នឹងចេញលក់នៅលើទីផ្សារក្នុងរយ:ពេល ៣០ ថ្ងៃទៀត ហើយវានឹងបំពាក់មកជាមួយជំនួយការសំឡេងឌីជីថលថ្មីផ្ទាល់ខ្លួនមួយ ដែលខុសពី Siri, Cortana, និង Alexa របស់ក្រុមហ៊ុន Apple, Microsoft, និង Samsung»។

Essential Phone នឹងដាក់លក់ក្នុងតម្លៃ ៦៩៩ ដុល្លារ (តម្លៃលក់ក្នុងតំបន់) ហើយវាអាចគាំទ្រជាមួយប្រព័ន្ធសេវារបស់ក្រុមហ៊ុនផ្គត់ផ្គង់បណ្តាញទូរសព្ទចល័តភាគច្រើនបំផុតក្នុងសហរដ្ឋអាមេរិក៕

ប្រភពព័ត៌មាន: recode

មតិយោបល់