ក្រុមអ្នកស្រាវជ្រាវបានប្រកាសថា ខ្លួនរកឃើញវ៉ាក់សាំងសម្រាប់ការពារមេរោគចាប់ជំរិតតាមប្រព័ន្ធអិុនធើណែតដែលបង្កភាពរំជើបរំជួយទូទាំងពិភពលោកនា​រយៈពេលចុងក្រោយនេះហើយ ប៉ុន្តែ ខ្លួនមិនទាន់អាចរកឃើញវិធីសម្លាប់វាបាននៅឡើយ។

លោក Amit Serper អ្នកស្រាវជ្រាវសន្តិសុខប្រព័ន្ធអិុនធើណែតម្នាក់មកពីក្រុមហ៊ុន Cybereason បានរកឃើញពីដំណើរការរបស់មេរោគចាប់ជំរិតដែលគេឱ្យឈ្មោះវា NotPetya។

នៅពេលជ្រាបចូលក្នុងប្រព័ន្ធកុំព្យូទ័រ វានឹងធ្វើការរុករកឯកសារមួយ ហើយនឹងចាក់ចេញពីដំណើរការបំផ្លែងឯកសារ (encryption) បើឯកសារនោះមានស្រាប់ក្នុង Harddisk កុំព្យួទ័រ។ ជនរងគ្រោះ អាចប្លុកការរាតត្បាតរបស់វាបាន ដោយការបង្កើតឯកសារនេះ លើម៉ាស៊ីនកុំព្យូទ័ររបស់ពួកគេ។

តាមការឱ្យដឹងពី Serper ដើម្បីចាក់វ៉ាក់សាំងការពារមេរោគ NotPetya គេអាចបង្កើតឯកសារមួយឈ្មោះ “perfc” នៅក្នុង Folder របស់កុំព្យូទ័រ ត្រង់ទីតាំង C:\Windows ហើយកំណត់ឱ្យវាអាចត្រឹមតែអានបាន ឬ read-only។

គួររំឭកថា កាលពីប៉ុន្មានថ្ងៃមុននេះ ពិភពលោកមានការជ្រុលច្របល់ក្នុងពិភពជំនួញដោយសារការវាយប្រហារទ្រង់ទ្រាយធំរបស់មេរោគបណ្តាញថ្មីនេះ ចាប់ពីក្នុងប្រទេសអ៊ុយក្រែន រុស្សុី បារាំង ហូឡង់ អាមេរិក រហូតដល់ប្រព័ន្ធកុំព្យូទ័ររោងចក្រថាមពលនុយក្លេអ៊ែរ Chernobyl៕

ប្រភពព័ត៌មានៈ darkreading