ខណៈក្រុមហ៊ុនផលិតស្មាតហ្វូនកំពុងប្រណាំងប្រជែងគ្នាលើបច្ចេកវិទ្យាស្កេនប្រស្រីភ្នែក និងស្កេនក្រយៅដៃ ក្រុមហ៊ុន Sony អាចនឹងមានបច្ចេកវិទ្យាថ្មីដែលល្អប្រសើរជាងនេះ សម្រាប់ទូរសព្ទត្រកូល Xperia ជំនាន់ក្រោយរបស់ខ្លួន។
ក្រុមហ៊ុនបច្ចេកវិទ្យាជប៉ុនមួយនេះ ត្រូវគេរាយការណ៍ថា អាចនឹងប្រើប្រាស់បច្ចេកវិទ្យាស្កេនមុខ 3D ថ្មីមួយ ហើយវាត្រូវគេរំពឹងថា នឹងបង្ហាញវត្តមានតាមរយៈទូរសព្ទ Xperia ម៉ូដែលថ្មី នៅឯសមាជ MWC ក្នុងសប្តាហ៍នេះ នាទីក្រុងសៀងហៃ ប្រទេសចិន។
នៅក្នុងសេចក្តីរាយការដដែលបន្ថែមថា Sony ប្រហែលកំពុងធ្វើការលើបច្ចេកវិទ្យាសម្គាល់ផ្ទៃមុខមនុស្សដ៏ទំនើបនេះ ខណៈខ្លួនមានក្រុមហ៊ុនបុត្រសម្ព័ន្ធ Sotkinect ដែលឯកទេសក្នុងការបង្កើតអង្គញាណចាប់ទីជម្រៅដើម្បីបង្កើតចេញជាប្លង់ផែនទីក្នុងទម្រង់ 3D។
ដោយចាប់ដៃគូជាមួយក្រុមហ៊ុនអភិវឌ្ឍបច្ចេកវិទ្យាសម្គាល់ផ្ទៃមុខរបស់ប្រទេសស្វីស LeyLemon ក្រុមហ៊ុនអេឡិចត្រូនិចយក្សរបស់ជប៉ុន កំពុងគ្រោងផ្លាស់ប្តូរបច្ចេកវិទ្យានេះ ទៅជាយន្តការសន្តិសុខសុវត្ថិភាពថ្មីមួយ។
KeyLemon អះអាងថា ប្រព័ន្ធនេះ គឺរឹងមាំ និងមានភាពបត់បែនជាងបច្ចេកវិទ្យាស្កេនផ្ទៃមុខ 2D ដែលវាមិនអាចត្រូវបានបំភាន់ដោយរូបថត ឬក្បាលមនុស្ស 3D នោះឡើយ ពីព្រោះវាមានភ្ជាប់ជាមួយសមត្ថភាពកាំរស្មីពន្លឺ Infra និងអាចស្កេនស្ទើរគ្រប់មុំនៃក្បាលមនុស្ស។

បច្ចេកវិទ្យានេះដែរ ត្រូវគេជឿថា ផ្តល់អត្ថប្រយោជន៍ខ្លាំងក្នុងការបង្កើតបច្ចេកវិទ្យារូបភាពនិម្មិតក្នុងប្លង់ពិតជាក់ស្តែង AR (Augmented Reality) ដែលក្រុមហ៊ុន Sony កំពុងបន្ថែមទម្ងន់ការងារទៅលើរឿងនេះ៕
ប្រភពព័ត៌មានៈ slashgear
មតិយោបល់