បើទោះបីជាក្រុមហ៊ុន Samsung និង Apple បានដឹកដៃគ្នាឡើងតុលាការជាច្រើនលើកច្រើនសារទៅហើយក្តី ពាក់ព័ន្ធទៅនឹងរឿងក្តីក្តាំងប៉ាតង់ យ៉ាងណាក៏ដោយ ក៏ក្រុមហ៊ុនបច្ចេកវិទ្យាយក្សកូរ៉េ ទទួលស្វាគមន៍ក្រុមហ៊ុនបច្ចេកវិទ្យាយក្សអាមេរិកដោយដៃពីរដៃបីដដែល ក្នុងនាមជាមួយម៉ូយ។

យោងតាមរបាយការណ៍ថ្មីមួយចុះផ្សាយនៅថ្ងៃសៅរ៍សប្តាហ៍មុនបានឱ្យដឹងថា ក្រុមហ៊ុន Samsung នឹងបោះទុន ២១ ពាន់លានដុល្លារ ដើម្បីសង់រោងចក្រចំនួនពីរទុកផលិតអេក្រង់ OLED ដែលគេសន្និដ្ឋានថា សម្រាប់ទូរសព្ទ iPhone ថ្ងៃអនា​គតមួយផ្នែក តាមការកម្ម៉ង់បន្ថែមពីក្រុមហ៊ុន Apple។ រោងចក្រថ្មីនោះ នឹងចាប់ផ្តើមដំណើរការចង្វាក់ផលិតកម្មរបស់ខ្លួនក្នុងឆ្នាំ ២០១៩ ហើយវានឹងអាចផលិតចេញអេក្រង់ OLED បន្ថែមចំនួន ២៧០,០០០ បន្ទះ ក្នុងមួយខែៗ។

គួររំឭកថា Samsung គឺជាអ្នកផ្គត់ផ្គង់ Hardware សម្រាប់ផលិតផល iOS Devices របស់ Apple ជាយូរមកហើយ។ ទំនាក់ទំនង​រវាងអ្នកផ្គត់ផ្គង់ និងម៉ូយនេះ បានបន្តរហូតដល់សព្វថ្ងៃ និងទៅអនាគត។ កន្លងមក​ Samsung ត្រូវគេរាយការណ៍ថា គឺជាអ្នកផ្គត់ផ្គង់អេក្រង់ OLED ចំនួន ១៨០ លានបន្ទះ សម្រាប់ iPhone 8 ហើយពីអតីតកាលក៏ឋិតក្នុងចំណោមក្រុមហ៊ុនមួយផលិតបន្ទះឈីប Ax តាមតម្រូវការរបស់ក្រុមហ៊ុន Apple ផងដែរ៕

ប្រភពព័ត៌មាន: yahoo