ក្រុមហ៊ុន Apple កំពុងបើកយុទ្ធនាការទីផ្សារទ្រង់ទ្រាយធំនៅក្នុងទឹកដីនៃប្រទេសចិន ដោយការផ្តល់ជូននូវការបញ្ចុះតម្លៃពិសេសសម្រាប់អតិថិជនណាដែលជ្រើសរើសប្រើមធ្យោបាយទូទាត់សាច់ប្រាក់តាមរយ:សេវា Apple Pay របស់ខ្លួន ដើម្បីប្រជែងជាមួយ Alibaba និង Tencent Holdings ដែលជាក្រុមហ៊ុនម្ចាស់ស្រុក។

ក្នុងរវាងពីថ្ងៃទី ១៨ ដល់ ២៤ កក្កដា រាល់អតិថិជនដែលប្រើប្រាស់សេវា Apple Pay ដើម្បីគិតលុយថ្លៃទំនិញនៅតាមផ្សារខាងក្រៅ ឬលើអនឡាញក្នុងប្រទេសចិន ជាមួយម៉ាស៊ីនគិតលុយដែលមាននិម្មិតសញ្ញា Quick Pass (ទូទាត់រហ័ស) របស់ក្រុមហ៊ុន UnionPay នឹងទទួលបានការបញ្ចុះតម្លៃរហូតដល់ ៥០%។ នេះបើយោងតាមគេហទំព័រផ្លូវការរបស់ក្រុមហ៊ុន Apple ជាភាសាចិន។

យោងតាមគេហទំព័រដដែលបានឱ្យដឹងបន្ថែមថា ហាងលក់រាយសរុប ២៨ កន្លែង ភោជនីយដ្ឋាន និងផ្សារទំនើបៗដូចជា 7-Eleven, Watsons, Starbucks, និង Burger King ព្រមទាំងហាងអិុនធើណែតអនឡាញ ១៦ កន្លែងផ្សេងទៀត នឹងធ្វើការចូលរួមក្នុងយុទ្ធនាការបញ្ចុះតម្លៃនេះ។

គួរបញ្ជាក់ថា នេះគឺជាលើកទីមួយហើយដែលក្រុមហ៊ុន Apple បើកយុទ្ធនាការទីផ្សារដ៏ធំបំផុតមិនធ្លាប់មានដូច្នេះ សម្រាប់ទូទាត់វិក្កយបត្រចល័ត Apple Pay របស់ខ្លួននៅក្នុងប្រទេសចិន ចាប់តាំងពីវាបានឈានជើងចូលក្នុងទីផ្សារនៃប្រទេសនេះ នៅថ្ងៃទី ១៨ ខែកុម្ភ: ឆ្នាំ ២០១៦។

ទោះយ៉ាងណា ក្រុមហ៊ុនបច្ចេកវិទ្យាអាមេរិក ត្រូវប្រឈមការប្រកួតប្រជែងជាមួយសេវាកម្ម Alipay, WeChat Pay, និង Tencent Pay ក្រុមហ៊ុនបច្ចេកវិទ្យាយក្សក្នុងស្រុក ដែលកំពុងក្តោបក្តាប់អតិថិជនមួយភាគធំរួចទៅហើយ។

ម្យ៉ាងទៀត ខុសពីសេវាទូទាត់ថ្លៃទំនិញតាមទូរសព្ទចល័តទាំងនោះដែលអាចដំឡើងប្រើនៅលើគ្រប់ប្រភេទស្មាតហ្វូន Apple Pay អាចដំឡើងប្រើបានតែនៅលើទូរសព្ទ iPhone ស៊េរីថ្មីៗ និងនាឡិកាដៃ Apple Watch ប៉ុណ្តោះ គិតត្រឹមពេលបច្ចុប្បន្ន៕

ប្រភពព័ត៌មាន: businessinsider