លោក Bill Gates បុរសមានជាងគេបំផុតក្នុងលោក បានបរិច្ចាគទ្រព្យធនចំនួន ៤.៦ ប៊ីលានដុល្លារ (ពាន់​​​លាន) ទៅដល់មូលនិធិ Bill & Melinda Gates ដែលនេះគឺជាចំនួនច្រើនបំផុតមិនធ្លាប់មាន ចាប់តាំងពីឆ្នាំ ២០០០ មក ដើម្បីចូលរួមចំណែកក្នុងសកម្មភាពមនុស្សធម៌ជុំវិញពិភពលោក។

យោងតាមឯកសារមួយរបស់គណកម្មការ សន្តិសុខ និងមូលបត្រ សហរដ្ឋអាមេរិក បានឱ្យដឹងថា​ ទំហំទឹកប្រាក់ដ៏ច្រើនមហិមានេះ ត្រូវបានលោក Gate កាត់ចេញពីភាគហ៊ុនរបស់ក្រុមហ៊ុន Microsoft ចំនួន ៦៤ លានហ៊ុន។ ដោយឡែក​ គេពុំទាន់ទទួលបានព័ត៌មានអំពីគម្រោងចាយវាយប្រាក់មូលនិធិនោះនៅឡើយទេ តែគេរំពឹងថា វានឹងយកទៅប្រើប្រាស់នៅក្នុងកម្មវិធីពង្រឹងសុខមាលភាពមនុស្ស និងកាត់បន្ថយភាពក្រីក្រធ្ងន់ធ្ងរក្នុងសកលលោក តាមរយៈមូលនិធិ Bill & Melinda Gates។

ប្រាក់មូលនិធិជិត ៥ ប៊ីលានដុល្លារនេះដែរ គឺមានចំនួនស្មើនឹង ៥% នៃទ្រព្យសម្បត្តិសរុបរបស់មហាសេដ្ឋីវ័យ ៦១ ឆ្នាំរូបនេះ ដែលមាននាពេលបច្ចុប្បន្នចំនួន ៩០ ប៊ីលានដុល្លារ ហើយគិតចាប់តាំងពីឆ្នាំ ១៩៩៤ មក លោកបានបរិច្ចាគទ្រព្យធនផ្ទាល់ខ្លួនចំនួន ៣៥​ ប៊ីលានដុល្លារហើយ សម្រាប់កម្មវិធីសប្បុរធម៌នៅជុំវិញពិភពលោក។ ក្នុងនោះ នៅឆ្នាំ ១៩៩៩ លោកបានផ្តល់ប្រាក់វិភាគទាន ដកចេញពីចំណែកហ៊ុននៃក្រុមហ៊ុន Microsoft ប្រមាណ ១៦ ប៊ីលានដុល្លារ ហើយគាត់បានបរិច្ឆាគប្រាក់ចំនួន ៥.១ ប៊ីលានដុល្លារ បន្ថែមទៀត នៅមួយឆ្នាំក្រោយមក។

ដោយរួមជាមួយសប្បុរជនដទៃផ្សេងទៀត មូលនិធិ Gate Foundation បានឈរនៅតារាងកំពូលនៃកម្មវិធីសប្បុរធម៌ឯកជនដែលប្រមូលបានប្រាក់ឧបត្ថម្ភគាំទ្រច្រើនជាងគេបំផុតក្នុងពិភពលោក ដែលមានចំនួនរហូតដល់ ៤០.៣ ប៊ីលានដុល្លារ ដោយមិនគិតប្រាក់មូលនិធិចុងក្រោយនេះ៕

ប្រភពព័ត៌មានៈ theguardian