បញ្ហាថ្មទូរសព្ទ iPhone ចាស់ ឬថ្មី នៅកាន់ភ្លើង ឬអត់ គឺជាកង្វល់របស់អ្នកប្រើប្រាស់ផលិតផលរបស់ក្រុមហ៊ុន Apple ទូទៅ ជាពិសេស លោកអ្នកដែលទិញទូរសព្ទស៊េរីនេះមួយទឹក។
កង្វល់នេះ កើនឡើងកាន់តែខ្លាំង បន្ទាប់ពីមានករណី iPhone 6s និង 6s Plus ដែលដើរលើប្រព័ន្ធ iOS 10 មួយចំនួន ជួបបញ្ហាស្រកថ្មយ៉ាងគំហុកដោយគ្មានមូលហេតុកាលពីឆ្នាំមុន។
ទាក់ទងទៅនឹងបញ្ហានេះ ក្រុមហ៊ុន Apple ក៏បានប្រកាសចេញនូវកម្មវិធីប្តូរថ្មថ្មីទៅឱ្យអតិថិជនដែលថ្មទូរសព្ទ iPhone 6s/ 6s Plus របស់ពួកគេជួបបញ្ហាដោយឥតគិតថ្លៃ។
ទោះយ៉ាងនេះក្តី សំណួរអំពីសុខភាពថ្មរបស់ទូរសព្ទដៃ iPhone នៅតែបន្តចោទឡើង ហើយដើម្បីឆ្លើយតបនឹងបញ្ហានេះ តាមរយ:ប្រព័ន្ធប្រតិបត្តិការកំណែថ្មីរបស់ខ្លួន ចាប់ពី iOS 10.2.1 ក្រុមហ៊ុនបានដាក់បន្ថែមនូវមុខងារថ្មីមួយ អាចវាស់ស្ទង់ដឹងពីសុខភាពថ្ម និងប្រាប់ដល់អ្នកប្រើប្រាស់ឱ្យបានដឹងថា ថ្ម iPhone របស់ពួកគេ គួរតែដល់ពេលប្តូរចេញហើយឬនៅ។
មែនទែនទៅ ដំណោះស្រាយនេះ ត្រូវបាន Apple ប្រកាសប្រាប់តាមគេហទំព័ររបស់ខ្លួន តាំងពីថ្ងៃទី ២១ មេសា មកម្លេះ។ ប៉ុន្តែ អ្នកប្រើប្រាស់ភាគច្រើនមិនបានចាប់អារម្មណ៍។
ពោលគឺ សម្រាប់ទូរសព្ទ iPhone ឬ iPad ដែលដើរលើប្រព័ន្ធ iOS ចាប់ពីជំនាន់ 10.2.1 ឡើង អាចឆែកដឹងពីសុខភាពថ្មទូរសព្ទរបស់ខ្លួន ដោយគ្រាន់តែចូលទៅកាន់កម្មវិធី Settings -> Battery ប៉ុណ្ណោះ។
នៅក្នុងនោះ ប្រសិនបើពួកគេឃើញសារមួយដាក់ថា “Your iPhone Battery may need to be serviced” នៅខាងលើផ្ទាំងកម្មវិធី នោះបានសេចក្តីថា សុខភាពវាមិនល្អទេ និងល្មមដល់ពេលប្តូរថ្មីហើយ។
ប្រភពព័ត៌មាន: Apple
មតិយោបល់