យោងតាមការស្ទាប់ស្ទង់មតិមួយធ្វើឡើងទៅលើមនុស្សចំនួន ៤០០០ នាក់ ដោយក្រុមហ៊ុន RBC Capital Markets បានរកឃើញថា ២៨% នៃនាក់ចូលរួមបានឆ្លើយថា ពួកគេកំពុងគ្រោងនឹងទិញ iPhone X (Ten) មកប្រើ នៅពេលណាមួយក្រោយពីទូរសព្ទដៃលំដាប់កំពូលរបស់ក្រុមហ៊ុន Apple មួយម៉ូឌែលនេះ ចេញលក់នៅថ្ងៃទី ៣ វិច្ឆិកា។

ប៉ុន្តែ ជាង ៥៧% នៃអ្នកទាំងនោះបាននិយាយថា ពួកគេ​ចង់បាន iPhone X មានមេម៉ូរីទំហំ ២៥៦ ជីហ្គាបៃយ តម្លៃ ១១៤៩ ដុល្លារ ជាងទំហំ ៦៤ ជីហ្គាបៃយ តម្លៃ ៩៩៩ ដុល្លារ។ នេះបើយោងតាមសេចក្តីរាយការណ៍ពីគេហទំព័រ Tom’s Guide កាលពីថ្ងៃម្សិលមិញ។

ក្រុមហ៊ុន Apple បានរងការរិះគន់មិនតិចទេកាលពីខែមុន ក្រោយពីការបើកបង្ហាញ iPhone X ប្រើមេម៉ូរីទំហំត្រឹម ៦៤ ជីហ្គាបៃយ តម្លៃ ៩៩៩ ដុល្លារ។ ទោះយ៉ាងណា ក្រោយពីការបង្ហាញ ក្រុមហ៊ុនក៏បញ្ចេញជម្រើសទំហំផ្ទុកទិន្នន័យដ៏គាប់ប្រសើរ ប៉ុន្តែ​ មានតម្លៃខ្ពស់ជាង ១៥០ ដុល្លារ ដែលធ្វើឱ្យវាជាប់ជាទូរសព្ទ iPhone ថ្លៃជាងគេបំផុតមិនធ្លាប់មានរបស់ក្រុមហ៊ុន។

នៅពេលដែល iPhone 8 ចេញលក់លើទីផ្សារ អ្នកវិភាគមួយចំនួនបាននិយាយថា ការលក់ចេញយឹតរបស់វា អាចមកពីអ្នកនិយមប្រើស្មាតហ្វូនប្រេនអាមេរិកមួយនេះភាគច្រើន រងចាំការមកដល់របស់ iPhone X ដែលពាំនាំមកជាមួយនូវរចនាបទយ៉ាងថ្មីស្រឡាង ព្រមទាំងបំពាក់មកជាមួយអេក្រង់ប្រភេទ Super Retina OLED និងបច្ចេកវិទ្យាស្គេនផ្ទៃមុខ Face ID សម្រាប់ដោះសោចូលទៅកាន់កម្មវិធីជាដើម។

ឥឡូវនេះ ដោយយោងតាមលទ្ធផលនៃការស្ទាប់ស្ទង់មតិរបស់ RBC បានបង្ហាញថា តម្លៃគឺមិនមែនជាបញ្ហានោះទេសម្រាប់អតិថិជនមួយចំនួនធំ។ តាមពិតទៅ iPhone ម៉ូឌែលថោកបំផុតវិញទេ ដែលមិនមានលក្ខណៈសម្បត្តិគ្រប់គ្រាន់អាចទាក់ទាញអតិថិជនបាននោះ។

យោងតាម RBC គឺមានតែមនុស្ស ១៧% ប៉ុណ្ណោះ ដែលចង់បាន iPhone 8 មកប្រើ ហើយសម្រាប់ម៉ូឌែល 8 Plus ដែលមានអេក្រង់ធំជាង និងតម្លៃខ្ពស់ជាង គឺមានអ្នកចង់បានច្រើនរហូតដល់ ២០%។

យោងតាមរបាយការណ៍មួយចំនួន បានឱ្យដឹងថា ក្រុមហ៊ុនបច្ចេកវិទ្យាយក្សរបស់អាមេរិក កំពុងជួបបញ្ហាក្នុងការផលិត iPhone X ដោយសារតែបញ្ហាមួយចំនួនកើតឡើងចំពោះមុខងារ Face ID ដែលអាចធ្វើឱ្យប៉ះពាល់ដល់បរិមាណផ្គត់ផ្គង់ឱ្យទាន់តម្រូវការទីផ្សារ នាប៉ុន្មានខែបន្ទាប់។

ម្លោះហើយ សម្រាប់លោកអ្នកដែលកំពង់ចង់ទិញ iPhone ដ៏ថ្លៃកប់ស៊េរីនេះ អាចនឹងត្រូវត្រៀនចិត្តអត់ធ្មត់រង់ចាំបន្តទៀត ឬក៏មានពេលវេលាបន្ថែមសម្រាប់សន្សំថវិកាសម្រាប់ម៉ូឌែលមានមេម៉ូរីទំហំ ២៥៦ ជីហ្គាបៃយ៕

ប្រភពព័ត៌មានៈ tomsguide