នៅទីបំផុតទៅ ថៅកែក្រុមហ៊ុនមហាយក្ស Amazon លោក Jeff Bezos អាចប្រជែងយកតំណែងមហាសេដ្ឋីមានជាងគេបំផុតលើពិភពលោកពីលោក Bill Gates បានម្តងទៀតហើយ នៅថ្ងៃសុក្រកន្លងទៅនេះ គឺបន្ទាប់ពីទ្រព្យសម្បត្តិលោកកើនជិត ៧ ពាន់លានដុល្លារបន្ថែម។

យោងតាមការគណនារបស់បណ្តាញសារព័ត៌មាន CNBC និងទិន្នន័យសន្ទស្សន៍ចំណាត់ថ្នាក់មហាសេដ្ឋីរបស់បណ្តាញសារព័ត៌មាន Bloomberg បានឱ្យដឹងថា នៅព្រឹកថ្ងៃសុក្រ តម្លៃហ៊ុនក្រុមហ៊ុន Amazon មានការស្ទុះឡើង ក្រោយពីរបាយការណ៍ចំណូលក្រុមហ៊ុនចេញផ្សាយជាសាធារណ: ដែលធ្វើឱ្យទ្រព្យសម្បត្តិរបស់លោក Bezos បានកើនឡើងដល់ជាង ៩០ ពាន់លានដុល្លារ។

នៅថ្ងៃជាមួយគ្នានោះដែរ តម្លៃស្តុកក្រុមហ៊ុន Microsoft ក៏មានការកើនឡើងចំនួន ៥៥០ លានដុល្លារផងដែរ ក្រោយពីក្រុមហ៊ុនបញ្ចេញរបាយការណ៍ចំណូលរបស់ខ្លួន ប៉ុន្តែ នៅតែទាបជាងក្រុមហ៊ុនផ្សារលក់ទំនិញអនឡាញ ដោយសុរបមានត្រឹម ៨៨.៥ ពាន់លានដុល្លារ។

គួរបញ្ជាក់ថា នេះមិនមែនជាលើកទីមួយរបស់លោក Bezos ទេ ដែលបានក្លាយជាបុរសមានជាងគេបំផុត​លើលោកនោះ។ នៅក្នុងខែកក្កដា ទ្រព្យសម្បត្តិរបស់លោក ធ្លាប់បានកើនលើសលោក Bill Gates ម្តងរួចទៅហើយ តែមួយថ្ងៃក្រោយមក លោក Gates ក៏អាចដណ្តើមបានមកវិញ៕

ប្រភពព័ត៌មាន: usatoday