ក្រុមហ៊ុន Facebook ទើបបានប្រកាសថា ចាប់ពីថ្ងៃនេះតទៅ អ្នកប្រើប្រាស់កម្ម​វិធី Messenger របស់ខ្លួន លើទូរសព្ទដើរដោយប្រព័ន្ធ Android និង iOS រាប់​លាន​នាក់ នឹងអាចផ្ញើ និងទទួលរូបថតគុណភាពកម្រិតខ្ពស់ដល់ 4K ពីឧបករណ៍មួយទៅមួយហើយ។

អ្នកប្រើប្រាស់ដំបូងដែលនឹងទទួលបានប្រយោជន៍នេះ គឺនៅ​សហរដ្ឋអាមេរិក កាណាដា បារាំង អូស្រ្តាលី ចក្រភពអង់គ្លេស សិង្ហបុរី ហុងកុង ជប៉ុន និងកូរ៉េខាងត្បូង។

លក្ខណ:សម្បត្តិថ្មីនេះ ត្រូវបានក្រុមហ៊ុនបណ្តាញសង្គមយក្សលើកឡើងថា​ គឺជាការឆ្លើយតបទៅនឹងសំណើររបស់អ្នកប្រើប្រាស់ជាច្រើន ដែលទទួចសុំមិនចង់ឱ្យរូបថតរបស់ពួកគេដែលមានកម្រិតគុណភាព 4K ប្រែទៅជាមិនច្បាស់ល្អ បន្ទាប់ពីបញ្ជូនឆ្លងកាត់តាមកម្មវិធី Facebook Messenger ទៅកាន់មិត្តភក្តិ​។

ពីមុនមក កម្មវិធីបណ្តាញសង្គមសារដ៏ពេញនិយមបំផុតនេះ ត្រូវបានក្រិតគុណភាព​រូបផ្ញើទៅមកខ្ពស់បំផុតត្រឹម 2K ប៉ុណ្ណោះ។ បើរូបភាពមានគុណភាពខ្ពស់ជាងនេះ វានឹងបន្ថយដោយស្វ័យប្រវត្តិតែម្តង។

សម្រាប់អ្នកប្រើប្រាស់នៅក្នុងប្រទេសដទៃ ក្រៅពីប្រទេសដែលមានរៀបរាប់មកពីខាងលើ នឹងអាចទទួលបានលក្ខណ:សម្បត្តិថ្មីនេះ នៅប៉ុន្មានសប្តាហ៍ខាងមុខ តាមរយ:កម្មវិធីកំណែថ្មី ដែលនឹងអាចទាញយកទៅដំឡើងតាមកម្មវិធី App Store ឬ Play Store លើទូរសព្ទដៃរបស់ខ្លួន៕

ប្រភពព័ត៌មាន: Facebook