(ឥណ្ឌា)៖ មិនត្រឹមតែក្ដោបទីផ្សារស្មាតហ្វូនៅក្នុងប្រទេសចិននោះទេ Android បានបន្តក្ដោបទីផ្សារស្មាតហ្វូននៅឥណ្ឌា ខណៈដែល Apple កំពុងយកចិត្តយកថ្លើមរដ្ឋាភិបាល​ក្នុងការ​ពង្រីកទីផ្សារស្មាតហ្វូន។

យោងតាមរបាយការណ៍ស្រាវជ្រាវរបស់ Strategy Analytics បានឲ្យដឹងថា មានស្មាតហ្វូនចំនួន ៣០.៧លានគ្រឿង​ត្រូវ​បានលក់នៅពាក់កណ្ដាលឆ្នាំនេះ ដោយក្នុងនោះ ស្មាតហ្វូនដែលប្រើប្រាស់​ប្រព័ន្ធដំណើរការ​ Android មាន​ ២៩.៨លាន​គ្រឿង មានន័យថា Android បានក្ដោបទីផ្សារស្មាតហ្វូននៅឥណ្ឌា បានរហូតដល់ ៩៧ភាគរយ។

ចំណែក iPhone របស់ក្រុមហ៊ុន Apple វិញលក់បាន ០.៨លានគ្រឿង ដោយបានធ្លាក់ចុះពី ១.២លានគ្រឿងកាលពីឆ្នាំ​មុន។ កាលពីឆ្នាំមុន iPhone ក្ដោបទីផ្សារស្មាតហ្វូននៅឥណ្ឌា បាន ៤.៥ភាគរយ ប៉ុន្តែ​នៅឆ្នាំនេះ បានធ្លាក់មកនៅត្រឹម ជាង ២ភាគរយ។

មូលហេតុដែលនាំឲ្យ iPhone មិនសូវទទួលបានការចាប់អារម្មណ៍នៅឥណ្ឌា ដោយសារតែ​ iPhone មានតម្លៃថ្លៃ ដូច្នេះ​ហើយ ទើបធ្វើឲ្យតួលេខនៃការលក់ធ្លាក់ចុះ៕