អាមេរិក៖ បច្ចុ​ប្បន្នលោក Mark Zuckerberg គឺជាកំពូលមហាសេដ្ឋី ដែលមានវ័យក្មេងជាងគេ និងជា​កំពូល​មហាសេដ្ឋីលំដាប់ទី៥នៅលើពិភពលោក ប៉ុន្តែក៏មានរឿងដ៏គួរឲ្យអស់សំណើច និង​មិនគួរឲ្យ​ជឿផងដែរ ពាក់ព័ន្ធនឹងរូបលោកផ្ទាល់។ ចង់ដឹងអត់ថា Mark Zuckerberg មានអាថ៌កំបាំងអ្វីខ្លះ?

០១) នៅផ្ទះពុំមានទូរទស្សន៍
ខណ:ដែលមនុស្សជាច្រើនចូលចិត្តមើលទូរទស្សន៍ និងមានទូរទស្សន៍នៅផ្ទះស្ទើរតែគ្រប់បន្ទប់នោះ បែរ​ជាស្ថាបនិក និងជានាយកប្រតិបត្តិ Facebook រូបនេះ ពុំមានទូរទស្សន៍សូម្បីតែមួយគ្រឿងនៅក្នុងលំនៅ​ដ្ឋានដ៏ស្កឹមស្កៃ។ តើមហាសេដ្ឋីរូបនេះអត់លុយទិញទូរទស្សន៍មែន? ថ្លែងប្រាប់ទូរទស្សន៍ ABC News លោក Mark Zuckerberg បានបញ្ជាក់យ៉ាងខ្លីថា «វាគឺជាការចំណាយពេលដ៏ឥតប្រយោជន៍បំផុត ក្នុងការមើលទស្សន៍»។ និយាយជារួមគឺលោកពុំមាន​ពេល​វេលាសម្រាប់មើលទស្សន៍តែម្ដង។

ចុចអានអត្ថបទ៖ ហេតុអ្វីបានជា Mark Zuckerberg មេធំ Facebook ចូលចិត្តពាក់អាវយឺតដដែល?

០២) បរិភោគតែបន្លែ
មិនមែនជាអ្នកកាន់សីល ឬអ្នកបួសនោះទេ ប៉ុន្តែមហាសេដ្ឋីវ័យ ៣២ឆ្នាំរូបនេះ បានបញ្ជាក់ថា លោក​បរិភោគតែបន្លែ ចំណែកសាច់សត្វវិញគឺលោកបរិភោគ ដរាបណាសាច់សត្វនោះ ជាសាច់សត្វដែលលោក​បានសម្លាប់ដោយផ្ទាល់ដៃ។ ការទម្លាប់ហូបបួសនេះ ត្រូវបានលោកបញ្ជាក់ថា វាបានធ្វើឡើងតាំងពីឆ្នាំ ២០១១។

ចុចអានអត្ថបទ៖ តើ Facebook ជះលុយប៉ុន្មានដើម្បីទិញយក Domain «facebook.com និង fb.com»?

០៣) ចំណាយពេល ៣០នាទី ឬច្រើនជាងនេះក្នុងមួយថ្ងៃដើម្បីអានសៀវភៅ
បើទោះបីជាលោកបានបោះបង់ការសិក្សានៅមហាវិទ្យាល័យក្ដី ប៉ុន្តែការសិក្សាវិញគឺលោកមិនធ្លាប់បោះ​បង់ឡើយ ពោលគឺលោកតែងតែ​ចំណាយពេលប្រមាណ ៣០នាទី ឬច្រើនជាងគេ ជារៀងរាល់ថ្ងៃមុនពេលចូលដេក ដើម្បីអានសៀវភៅ។ លោកថែមទាំងបាន​បញ្ជាក់ថា ការអានសៀវភៅគឺជា​ការសិក្សាដ៏ល្អមួយ ហើយលោកក៏បានជំរុញមនុស្សនៅទូទាំង​ពិភព​លោក​ឲ្យអានសៀវភៅឲ្យបានច្រើន ដើម្បីពង្រីកចំណេះដឹងផ្ទាល់ខ្លួន ដើម្បីជាប្រយោជន៍។

ចុចអានអត្ថបទ៖ ១០ប្រទេស ដែលមានអ្នកប្រើ Facebook ច្រើនជាងគេបំផុតក្នុងឆ្នាំ ២០១៦

គួរបញ្ជាក់ផងដែរថា គិតត្រឹមថ្ងៃនេះ ទស្សនាវដ្ដី Forbes បានវាយតម្លៃថា លោក Mark Zuckerberg មាន​លុយចំនួន ៥៤.៥លានដុល្លារអា​មេរិក៕